La gievgia saira tard hai dà ina crudada da blocca al pass dal Bernina. Var 1000 meters cubic blocca e crappa èn sa distatgads. Da quai èn var 5 meters cubics crudads fin giu sin la via dal Bernina, quai sin l'autezza da Pisciadell. Pervia da las lavurs da rumida è la via tranter Pisciadell e S. Carlo previsiblamain serrada fin dumengia per motivs da segirezza.
Plirs craps da differenta grondezza èn crudads la gievgia saira giu sin la via dal Bernina. Ina gronda part dal material è sa fermada sin la spunda sur la via. La crudada da blocca è capitada gist en il sectur dal plazzal actual, nua che la via dal Bernina vegn renovada. En la zona da distatga, var 100 meters sur la via, sa chattan anc plirs lieus che ston vegnir stabilisads cun rumir il material dal grip.
Mesiras immediatas
Pervia da la segirezza da las collavuraturas e dals collavuraturs han las lavurs da rumida pudì vegnir cumenzadas pir, suenter ch'in geolog ha dà liber il lieu da privel. Il giudicament geologic mussa, che var 1000 meters cubic blocca e crappa èn sa distatgads. Ina gronda part è vegnida retegnida dals indrizs da protecziun ch'èn installads temporarmain sur il plazzal. Per puspè pudair avrir la via uschè svelt sco pussaivel, èn vegnidas instradadas anc il venderdi differentas mesiras immediatas. Tranter auter vegni taglià bostgs exponids, rumì material dal grip en il sectur da la zona da distatga sco er installà palissadas da protecziun.
Las collavuraturas ed ils collavuraturs da l'Uffizi da construcziun bassa e da las interpresas externas lavuran cun grond engaschament vi da la rumida e vi da la segirada da la via, uschia che tala po previsiblamain puspè vegnir averta en il decurs da la dumengia.
Stadi da las vias
Infurmaziuns actualas chattais Vus da tut temp sut www.strassen.gr.ch.
Fotografias agiuntadas:
Foto 2: Crudada da blocca sin la via dal Bernina
Infurmaziuns:
Gion Hagmann, schef dal Mantegniment da las vias, Uffizi da construcziun bassa dal Grischun, tel. +41 79 400 44 91, e‑mail Gion.Hagmann@tba.gr.ch
Responsabladad: Uffizi da construcziun bassa