La Regenza è s'occupada da la petiziun «Nov Plan directiv chantunal Energia dal vent – uschia na va quai betg!», ch'è vegnida inoltrada da la PPS Grischun ils 4 d'october 2023 al chantun. Pretendì vegni da refusar il Plan directiv chantunal Energia (PDChant Energia) e da l'elavurar da nov ensemen cun las vischnancas. La petiziun è vegnida sustegnida online da 2717 persunas.

La Regenza ha prendì enconuschientscha da l'entrada da la petiziun. Ella menziunescha, che l'elavuraziun d'in Plan directiv Energia saja obligatorica dapi l'onn 2018 tenor il dretg federal en connex cun la Strategia d'energia 2050. Il Plan directiv Energia saja vegnì elavurà tenor tut las prescripziuns dal dretg federal e chantunal. Il chantun Grischun stoppia – sco auters chantuns er – elavurar las basas ch'infurmeschian, tge territoris ch'èn adattads per la producziun d'electricitad ord energia regenerabla. La procedura da cooperaziun haja durà pli che 5 1/2 mais ed il sboz dal plan directiv saja vegnì preschentà a chaschun da differentas occurrenzas.

En il process da la planisaziun dal territori è in plan directiv in emprim pass da planisaziun che na fa naginas determinaziuns concretas per singulas parcellas e che n'è er betg liant per las proprietarias ed ils proprietaris dals bains immobigliars. I na vegnan concedidas naginas permissiuns da construcziun – in'eventuala utilisaziun ha lieu pir sin il proxim stgalim da la planisaziun d'utilisaziun ubain en il rom da l'approvaziun d'in project.

Prendì enconuschientscha da la petiziun

La Regenza ha approvà la revisiun parziala da la planisaziun locala, che la vischnanca da Bregaglia aveva concludì ils 23 da favrer 2023. Uschia ha ella stgaffì las premissas necessarias per construir ina chasa da parcar cun ina fermada da bus en il territori «Clüs» a Soglio sco er per engrondir la plazza da parcar existenta en il territori «Plazzüra». Per quest project vegnan fatgas pitschnas adattaziuns en las zonas respectivas.

© 2020 Andrea Badrutt, Cuira