Cun la midada d'urari dals 10 da december 2023 vegn amplifitgada la purschida en il chantun Grischun. Tranter Landquart e Tavau Plaz vegnan introducids il tact d'ina mes'ura senza midada da tren sco er il tact d'ina ura sin la lingia da Landquart – Vereina – San Murezzan. Meglras purschidas da notg èn planisadas en las regiuns Surselva e Planeiras/Alvra. Plinavant profitan las viagiaturas ed ils viagiaturs da la furniziun d'ulteriurs trens moderns dal tip Capricorn tar la Viafier retica.
Cun la midada d'urari che ha lieu dumengia, ils 10 da december 2023, lascha la Viafier retica circular trens moderns dal tip Capricorn en Surselva. Ultra da quai concentrescha ella sia purschida tranter Glion e Cuira cun in tren supplementar la damaun baud ad in tact da mes'ura. En il Partenz porscha la Viafier retica – cun l'introducziun cumpletta dal concept da trens accuplabels – da nov in tact da mes'ura senza midada da tren tranter Landquart e Tavau Plaz sco er in tact d'ina ura nuninterrut sin la lingia da Landquart – Vereina – San Murezzan. En quest connex vegn er optimada la viafier S, che cumpiglia ils dus trens express regiunals Schiers – Tusaun e Schiers – Razén, ils quals circuleschan en il tact da mes'ura. Uschia datti mintga mes'ura colliaziuns senza midada da tren davent da questas regiuns en direcziun da las trais staziuns da la citad da Cuira.
Er las Viafiers federalas prevesan tschertas meglieraziuns sin la lingia InterCity 3 Turitg – Cuira. Sin questa lingia vegn purschì da nov in tact da mes'ura nuninterrut durant las fins d'emna. Plinavant vegnan dublegiadas durant las fins d'emna las colliaziuns dad InterCity davent da Genevra/Berna fin a Cuira, uschia ch'i dat da nov quatter empè da duas colliaziuns. En connex cun las colliaziuns internaziunalas amplifitgeschan las Viafiers federalas la purschida per Minca ad in tact da duas uras nuninterrut.
Dapli lingias, in tact pli concentrà e meglras colliaziuns cun ils bus
Il nov urari dal bus tranter Tusaun e Razén en Tumleastga optimescha las colliaziuns cun il tact da mes'ura da la Viafier retica e porscha a las passagieras ed als passagiers colliaziuns supplementaras. Per part vegnan adattadas las lingias da bus. Plinavant vegnan introducids ulteriurs numers da lingia per render pli chapaivla la rait. Per singuls lieus, sco Seglias, Scharàns, Farschno, Pratval e Cazas, resulta in tact da mes'ura la damaun e la saira durant il temp da viadi principal da las pendularias e dals pendularis.
D'ina meglra purschida profita er la Val Puschlav: Sin la lingia Campocologna – Poschiavo – Percosta circuleschan ils bus da glindesdi fin venderdi durant il temp da scola da nov en in tact d'ina ura nuninterrut, ils ulteriurs dis vegn purschì per l'emprima giada in tact da duas uras.
Er sin autras lingias da bus èn planisadas optimaziuns: Uschia circuleschan ils autos da posta da Zernez sur il Pass dal Fuorn en la Val Müstair da nov durant l'entir onn en il tact d'ina ura. Tranter l'Engiadin'Ota, la Bregaglia e Clavenna (I) circuleschan novs bus express durant la stagiun da stad. Grazia a bunas colliaziuns reduceschan quels il temp da viadi per Colico – Milaun. En la Surselva vegn la purschida sin las lingias da bus las pli frequentadas, sco la Val Lumnezia, per Sursaissa, Andiast e Breil, optimadas durant ils temps da viadi principals. Tranter Cuira e Tschiertschen vegnan – cun la midada d'urari – serradas las largias en il tact ed i vegn introducì in tact d'ina ura nuninterrut. En la Val dal Rain da Cuira vegnan las colliaziuns coordinadas meglier ina cun l'autra ed i vegnan stgaffidas singulas novas colliaziuns, sco per exempel ina colliaziun la damaun baud da Favugn per Cuira. Sin il traject Cuira – Tumein survegnan las lingias dal Bus da Cuira novs numers, quai per meglierar la survista.
Amplificaziun dal bus da notg
Cun amplifitgar la purschida vegni tegnì quint da l'augment da la dumonda durant la saira. Quest onn vegni focussà sin la lingia da Cuira – Planeiras. Cumplettà vegn quai tras ina nova purschida «on-demand» (PubliCar) per la repartiziun detagliada en il territori da Planeiras e d'ina part da la Val d'Alvra. La Surselva profita er d'ina amplificaziun da la purschida durant la notg. Da nov circulescha il bus da notg il venderdi e la sonda durant l'entir onn, e quai en tut ils lieus pli gronds da la Surselva fin a Dieni.
Cun il GA-Night per 99 francs per onn stat a disposiziun als giuvenils ina purschida attractiva che n'è betg mo valaivla en il Grischun, mabain en tut la Svizra per tut las lingias da bus e da tren, quai mintgamai a partir da las 19.00.
Agiuntas:
Infurmaziuns:
- Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 10.00 fin las 11.00), e‑mail Carmelia.Maissen@diem.gr.ch
- Thierry Müller, manader da la partiziun Traffic public, Uffizi d'energia e da traffic, tel. +41 81 257 36 04 (erreichbar von 10.00 bis 12.00 Uhr), e‑mail Thierry.Mueller@aev.gr.ch
Responsabladad: Uffizi d'energia e da traffic
Tariffas pli simplas en las aglomeraziuns
Per simplifitgar il sistem tariffar dal consorzi tariffar Transreno tranter Razén e Landquart vegn introducida da nov ina tariffa da zonas. Entaifer las zonas pon ils trens ed ils bus vegnir utilisads tenor plaschair. A Tavau ed a Claustra vegn il consorzi tariffar da fin ussa dividì en dus consorzis separads ed i vegn medemamain introducida ina tariffa da zonas. Plinavant vala il BÜGA da nov er sin ils trajects da tren da Ragaz Bogn fin a Sargans sco er da Castione – Arbedo fin a Bellinzona. Pervia da l'augment da la taglia sin la plivalur e pervia dals custs pli auts è necessaria in'adattaziun moderada da las tariffas, ch'è dentant sut la media svizra.