La Regenza ha approvà ils 26 plazs provisorics da «scolaziun speziala separativa» che la la Scola-dimora Cuira vegn a metter a disposiziun a partir da l'onn da scola 2024/2025 fin la fin da l'onn da scola 2027/2028. Ils custs per il persunal supplementar sco er per il tschains da locaziun èn budgetads cun var 737 000 francs per l'onn 2024 respectivamain cun var 1,77 milliuns francs a partir da l'onn 2025.

L'onn passà è sa mussà in basegn supplementar da var 20 plazs en la scolaziun speziala separativa pertutgant il sectur d'impediments. Pervia dal curt termin sco er pervia dal grond basegn da localitads che cumpiglia ultra da locals d'instrucziun er locals da gruppa, stanzas da terapia e sumegliantas chaussas, n'èsi betg stà pussaivel da realisar quests plazs per l'onn da scola 2023/24. Perquai vegnan las classas existentas divididas e duas classas d'integraziun professiunala vegnan translocadas davent da la Scola-dimora da Cuira a Landquart.

© La Scola-dimora Cuira

En il rom da la Nova politica regiunala da la Confederaziun (NPR) ha la Regenza concedì ina contribuziun da tut en tut 1,45 milliuns francs per il project «Fairtrail en il Grischun 2024-2027». Las contribuziuns NPR van mintgamai per la mesadad sin donn e cust da la Confederaziun e dal chantun.

Il svilup dinamic da velos da muntogna e da velos electrics da muntogna a procurà per frequenzas pli grondas sin las sendas da viandar e sin las vias da mountainbike. En il rom dal project «Fairtrail en il Grischun 2024-2027» vegnan realisadas mesiras cumplessivas per promover la coexistenza reala da viandar e dad ir cun velo da muntogna en il Grischun. In'attenziun speziala vegn dada al sectur dal guaud e da la selvaschina sco er da l'economia d'alp, perquai che là vegn localisà il basegn d'agir il pli grond. Responsabel per realisar il project è l'Uffizi da construcziun bassa dal Grischun sco Post spezialisà per il traffic betg motorisà.

Cun «graubünden Bike», «graubünden Hike» e «graubünden Trailrun» ha il Grischun surpiglià ina rolla da pionier ed ha uschia conquistà in avantatg da concurrenza en il sectur dal traffic betg motorisà (viandar, ir cun velo da muntogna). Grazia a la cuntinuaziun da la mesira «Fairtrail», po il Grischun mantegnair quest avantatg. Er sin plaun naziunal ha il project sveglià attenziun. La stad 2023 ha il chantun Grischun fatg in contract da licenza cun il chantun Vallais.

© Cuira turissem

A l'uniun «la pendenta» ha la Regenza concedì ina contribuziun chantunala da maximalmain 586 000 francs als custs totals imputabels per construir ina nova punt pendenta tranter Mustér e la fracziun da Mumpé Medel. Ils custs da quest project importan tut en tut circa 2 milliuns francs. La punt pendenta duai traversar il Rain Anteriur en in'autezza da var 100 meters e manar davent da la chaplutta istorica Sontga Gada fin a Mumpé Medel. Cun sia lunghezza da 270m vegn «la pendenta» ad esser la punt pendenta la pli lunga sin il territori dal chantun Grischun.

Mustér e Mumpé Medel èn oz separads in da l'auter tras la chavorgia dal Rain a Cuflons. Las persunas che vulan traversar il Rain a pe, ston surmuntar dad omaduas varts da la chavorgia ina differenza d'autezza da 100 meters. «La pendenta» cumplettescha pia per propi la rait da sendas existenta. La punt pendenta rinforza il turissem da viandar en la Surselva. Ultra da la ruta locala da SvizraMobila «Senda Desertina» duai er la via da pelegrinadi istorica, da Constanza (D) a Pavia (I) «Via Francisca del Lucomagno» passar sur la punt. Plinavant ha «la pendenta» cun sia lunghezza ed autezza considerabla il potenzial da daventar in'attracziun turistica. Il traject da la senda da viandar che maina sur la nova punt pendenta, ha ina impurtanza speziala per il chantun, quai tant pervia da sia funcziun da rait speziala sco er en vista a sia attractivitad turistica.

A l'uniun «Festa federala da tir 2026 a Cuira en il Grischun» ha la Regenza concedì differentas contribuziuns chantunalas per la realisaziun da l'occurrenza da sport la pli gronda da la Svizra. Da la finanziaziun speziala Sport ha la Regenza garantì 200 000 francs a l'uniun, ed ulteriurs maximalmain 300 000 francs sin basa da la Lescha per promover il svilup economic (en il senn da la promoziun d'occurrenzas).

Questa occurrenza gronda è gia vegnida organisada a Cuira ils onns 1842 (Quaderwiese), 1949 e 1985 (Rossboden). L'onn 2026 vegn la 59 avla Festa federala da tir danovamain ad avair lieu en la chapitala dal Grischun. Tut en tut vegnan spetgads var 36 000 participantas e participants e var 100 000 visitadras e visitaders da la festa. Il center da la festa vegn ad esser sper l'implant da tir existent Rossboden a Cuira. Plinavant vegnan integrads 20 fin 25 ulteriurs implants da tir da differentas vischnancas grischunas en las festivitads ed en il manaschi da tir. Per realisar la Festa federala da tir 2026 quintan ils organisaturs cun custs totals dad 1,4 milliuns francs.

La Regenza ha approvà in project per curreger la via da Spleia sin il traject Steina fin Hüschera. In element impurtant da quest traject da via è la punt dal Hüscherabach sur il vitg da Spleia. Quella è vegnida construida l'onn 1928.

Il zercladur 2019 ha la punt dal Hüscherabach subì gronds donns ed è dapi lura intransibla per tut il traffic. Da la vart sid da la punt hai ultra da quai lavà davent in toc da la via. Sco soluziun transitorica è vegnida construida ina punt provisorica sur il Hüscherabach. L'analisa da la punt d'atschal existenta ha mussà, ch'ella sto vegnir remplazzada tras ina punt nova, quai pervia da ses stadi manglus e pervia da sia capacitad da chargia insuffizienta. Ils custs totals dal project importan circa 2,34 milliuns francs. Da quels vegnan duvrads 1,61 milliuns francs per la construcziun da la punt nova.