Dals 15 fin ils 30 da mars 2025 ha lieu a San Murezzan ed a Silvaplauna il campiunadi mundial da freestyle. L'uniun che organisescha l'occurrenza quinta cun custs totals da var 18,53 milliuns francs per realisar quest eveniment grond. A l'uniun FIS Freestyle World Championships 2025 Engiadina / San Murezzan ha la Regenza garantì ina contribuziun chantunala da maximalmain 2 milliuns francs per quest intent.

Quai vegn ad esser l'emprim campiunadi mundial da freestyle che vegn organisà en Svizra. Spetgads vegnan var 1200 atletas ed atlets sco er assistentas ed assistents da 35 naziuns. Ultra da quai quintan ils organisaturs cun var 70 000 aspectaturas ed aspectaturs al lieu. Sin l'entir mund vegn il campiunadi mundial da freestyle er persequità sin ils moniturs: Il campiunadi mundial da freestyle 2019 a Park City (USA) han guardà live a la televisiun circa 60 milliuns persunas, cunzunt da la Svizra, da la Germania, da l'Austria e da la China.

© Uniun FIS Freestyle World Championships 2025 Engiadina / San Murezzan

Per construir ina halfpipe sin il Corvatsch ha la Regenza concedì – en il rom dal Concept dals implants da sport d'impurtanza naziunala (CISIN) – ina contribuziun chantunala en l'autezza da 700 000 francs a la Corvatsch SA Silvaplauna. Gia il settember 2023 aveva l'Uffizi federal da sport garantì ina contribuziun federala CISIN en l'autezza dad 800 000 francs a la Corvatsch SA.

La halfpipe vegn construida sco superpipe, quai vul dir sco gronda halfpipe che vegn duvrada per las disciplinas «snowboard halfpipe» u «freeski halfpipe». En Svizra na datti – ultra da la halfpipe a Laax – naginas ulteriuras halfpipes da questa grondezza. Per construir la halfpipe èn budgetads custs totals da var 4,82 milliuns francs.

Als organisaturs dal campiunadi mundial da biatlon da la International Biathlon Union (IBU) 2025 a Lai ha la Regenza concedì ina contribuziun chantunala en l'autezza da maximalmain 1,15 milliuns francs. L'uniun Campiunadi mundial da biatlon da la IBU 2025 a Lai quinta cun custs da tut en tut 12,13 milliuns francs per l'occurrenza.

Il campiunadi mundial da biatlon ha lieu dals 12 fin ils 23 da favrer 2025 en l'arena da biatlon a Lai. Tut en tut vegnan spetgads 450 atletas ed atlets da 45 naziuns e var 150 000 aspectaturas ed aspectaturs al lieu. Quai vegn ad esser l'emprim campiunadi mundial da biatlon che vegn organisà en Svizra. A l'occurrenza gronda vegnan differentas staziuns da televisiun internaziunalas a cuntanscher previsiblamain 170 milliuns persunas.

© Uniun Campiunadi mundial da biatlon da la IBU 2025 Lai

La Regenza ha dà glisch verda per la reparaziun da la via da la Val Stussavgia sin il traject tranter l'aclaun Mura e l'access a l'aclaun Under Camana. Il traject da via en la part entasum la Val Stussavgia è en in nausch stadi. In motiv essenzial per ils numerus donns è la mancanza d'ina protecziun cunter la schelira. Ultra da quai na correspundan las ladezzas da la via tranter 3 e 3,5 meters sco er la limitaziun dal pais a 18 tonnas betg pli als basegns ed als standards actuals.

En il rom dal project vegn la via schlargiada ad ina ladezza da 4,2 meters. Uschia vegnan dus autos da persunas a pudair sa cruschar en il futur. Cun il standard tschernì vegn augmentada la segirezza dal traffic e dal manaschi sin la via da colliaziun, e la circulaziun dal traffic vegn meglierada. Ils custs totals da quest project èn budgetads cun 7,52 milliuns francs.

La Regenza ha approvà la revisiun parziala da la planisaziun locala che la vischnanca da Tavau aveva concludì ils 14 da matg 2023. En il territori Gadastatt-Tanne stgaffescha ella uschia las premissas ch'èn necessaris per domiciliar interpresas pitschnas e mesaunas.

Per l'utilisaziun industriala previsa vegn determinada ina zona da mastergn sin l'areal tranter la Landwasser e la via chantunala. Pervia da las midadas da zona e pervia da las dezonaziuns, che vegnan fatgas a medem temp, procuran las mesiras da planisaziun tut en tut per ina reducziun da las zonas da construcziun.

© Comet Photoshopping ScRL, Dieter Enz (2016)