Al Center svizzer d'electronica e da microtecnologia SA (CSEM SA) ha la Regenza concedì ina contribuziun chantunala da 7,4 milliuns francs per il project «Center regiunal CSEM Landquart» per ils onns 2024 fin 2027, quai sin basa da la Lescha per promover il svilup economic en il chantun Grischun. Per il project èn previs custs totals imputabels da previsiblamain 19,4 milliuns francs. Ultra da quai vegn concedida ina contribuziun da 600 000 francs en il rom da la Nova politica regiunala da la Confederaziun (NPR). Las contribuziuns NPR van mintgamai per la mesadad sin donn e cust da la Confederaziun e dal chantun.

La CSEM SA è in center da perscrutaziun e da svilup svizzer cun il focus sin nanotecnologia e microtecnologia. Ella renda accessiblas novas tecnologias a l'industria ed ella gida las interpresas a rinforzar lur cumpetitivitad cun agid da products, da process e da servetschs innovativs. La CSEM SA è represchentada en l'entira Svizra cun var 570 collavuraturas e collavuraturs fitg qualifitgads en sis lieus (Neuchâtel, Turitg, Berna, Alpnach, Allschwil e Landquart). Cun tut sias tecnologias sustegna ella interpresas pitschnas e mesaunas sco er manaschis industrials al lieu. Il center regiunal CSEM Landquart è spezialisà sin ils secturs «Tools of Life Sciences» e «Photonics». Quai tegna er quint fermamain da la structura da las branschas dal chantun Grischun. Il CSEM Landquart è s'etablì dapi sia fundaziun l'onn 2007 ed è daventà in partenari essenzial per interpresas en la regiun.

© CSEM SA

La fundaziun Institut svizzer per la climatologia alpina e la medischina Tavau (ISP) maina a Tavau l'Observatori fisical-meteorologic/Center mundial da radiaziun (OFMT/CMR), ch'è in center internaziunal per la calibraziun d'instruments che mesiran la radiaziun meteorologica. Tals instruments che mesiran la radiaziun meteorologica sviluppa el er per il diever sin terra ed en l'univers, ed el perscrutescha l'influenza da la radiaziun dal sulegl sin il clima da la terra. En ina cunvegna che datescha da l'onn 1978 e ch'è vegnida renovada periodicamain dapi lura, han il Departament federal da l'intern (represchentà tras MeteoSvizra), il chantun Grischun, la vischnanca da Tavau e la fundaziun ISP reglà la finanziaziun dal OFMT/CMR.

Per la perioda da prestaziun 2024 fin 2027 ha la Regenza concedì ina contribuziun chantunala annuala da 550 000 francs. La premissa per questa contribuziun annuala dal chantun èn las contribuziuns da finanziaziun annualas da var 1,46 milliuns francs da la Confederaziun e da 710 000 francs da la vischnanca da Tavau.

© OFMT/CMR

La Regenza ha approvà las incaricas da prestaziun cun l'uniun «Casa Depuoz» a Trun sco er cun la fundaziun «Gott hilft» a Zizers. Omaduas incaricas da prestaziun entran en vigur il 1. da schaner 2024 e valan fin ils 31 da december 2026.

Gia dapi l'onn 2020 existan incaricas da prestaziun cun l'uniun «Casa Depuoz» e cun la fundaziun «Gott hilft» per la collocaziun d'uffants e da giuvenils betg accumpagnads en la procedura d'asil. Las duas incaricas da prestaziun actualas eran vegnidas elavuradas sin basa da la situaziun da quella giada, cura che paucas persunas minorennas betg accumpagnadas vegnivan attribuidas al chantun Grischun. Dapi la fin da l'onn 2022 vegnan però attribuidas al chantun dapli persunas minorennas betg accumpagnadas. Cun agid da l'uniun «Casa Depuoz», da la fundaziun «Gott hilft» e d'ulteriurs furniturs da prestaziuns duain las novas incaricas da prestaziun metter a disposiziun ina purschida d'abitar e d'accumpagnament ch'è d'ina vart adattada al basegn e che sustegna da l'autra vart l'integraziun sociala ed economica da las requirentas e dals requirents d'asil minorens betg accumpagnads. Per assister e per collocar l'onn 2024 las persunas minorennas betg accumpagnadas che abitan oz en il Grischun, resultan previsiblamain custs da var 350 000 francs.