Las 101 vischnancas grischunas èn preparadas per eventualas periclitaziuns. A questa conclusiun vegn l'Uffizi da militar e da protecziun civila, suenter che las analisas da las periclitaziuns èn terminadas e che la gronda part da las commembras e dals commembers dals stabs directivs communals èn vegnids scolads.

L'Uffizi da militar e da protecziun civila (UMPC), l'Uffizi da guaud e privels da la natira (UGP) e l'Assicuranza d'edifizis dal Grischun (GVG) han realisà e terminà las analisas da las periclitaziuns en stretga collavuraziun cun las vischnancas. Sut la direcziun dal UMPC èn vegnids installads, scolads e perfecziunads er ils stabs directivs communals durant ils ultims onns. Uschia han las vischnancas ina buna basa per dar dumogn ad eventuals eveniments.

Las bovas da Bondo e da Brinzauls han mussà, ch'ils stabs directivs communals èn abels da dumagnar gronds eveniments. Tut tenor la situaziun da partenza vegnan els sustegnids – en cas da basegn – dals posts chantunals cumpetents e dal Stab directiv chantunal.

«Las basas per l'ulteriura elavuraziun dal management integral da las ristgas èn pia avant maun en tut las vischnancas», di Bruno Casutt, il manader partent dal sectur Protecziun da la populaziun / servetschs e vicemanader da l'Uffizi da militar e da protecziun civila. Las periclitaziuns èn vegnidas analisadas cun la participaziun da tut las persunas ch'èn involvidas, cura ch'igl è da dar dumogn ad in eveniment. Uschia ha pudì vegnir cuntanschì in princip impurtant per surventscher eveniments, numnadamain «durant crisas enconuscher ils chaus» ed er lur cumpetenzas.

Unic chantun en Svizra
Il Grischun è l'unic chantun, nua che tut las vischnancas han fatg in'analisa da las periclitaziuns. Questas analisas da las periclitaziuns en las vischnancas han er las finamiras da procurar che las commembras ed ils commembers dals stabs directivs communals – e la finala er la populaziun – sajan conscients dals privels pussaivels sco er da preparar mesiras e plans d'urgenza respectivs, sco per exempel concepts d'evacuaziun, d'assistenza e da communicaziun e.u.v. Sin fundament da las analisas da periclitaziuns realisescha l'Uffizi da militar e da protecziun civila ensemen cun ils stabs directivs communals – en il rom dal management integral da las ristgas – exercizis en vista ad eveniments pussaivels, quai resguardond la pli gronda probabilitad ch'in eveniment capitia e la pli gronda dimensiun dals donns.

Infurmaziuns:

• Pascal Porchet, manader da l'uffizi, schef dal Stab directiv chantunal, Uffizi da militar e da protecziun civila, tel. +41 81 257 35 22 (cuntanschibel da las 13.00 fin las 14.00), e‑mail Pascal.Porchet@amz.gr.ch
• Bruno Casutt, manader dal sectur Protecziun da la populaziun / servetschs, Uffizi da militar e da protecziun civila, tel. +41 81 257 35 26 (cuntanschibel da las 13.00 fin las 14.00), e‑mail Bruno.Casutt@amz.gr.ch
• Alex von Wyl, coordinatur Protecziun da la populaziun, manader dal project Analisas da las periclitaziuns, tel. +41 81 257 35 18 (cuntanschibel da las 13.00 fin las 14.00), e‑mail Alex.Vonwyl@amz.gr.ch

Responsabladad: Uffizi da militar e da protecziun civila