Dapi la crudada da grippa da sonda, ils 23 da december 2023,vegnan las lavurs da segirezza e da rumida fatgas cun tutta forza. L'Uffizi da construcziun bassa dal Grischun è optimistic, ch'el po la fin da schaner puspè dar liber la via d'Engiadina tranter Vinadi ed il cunfin naziunal, quai sin in vial.

Tranter 15 000 fin 20 000 meters cubic material da grippa èn sa distatgads sonda, ils 23 da december 2023, sur la via d'Engiadina tranter il spartavias Vinadi ed il cunfin naziunal (guardar communicaziun a las medias dals 23-12-2023). Il mir da sustegn da la vart da la muntogna, ils vials sco er l'ur dal mir da sustegn da la vart da la val èn vegnids donnegiads fermamain e destruids dal tuttafatg sin ina lunghezza da circa 20 meters.

Vastas lavurs da sanaziun
Gia la fin da l'onn 2023 han ins cumenzà a rumir il material dal grip per allontanar la crappa lucca en la zona da distatga. En il fratemp han ins terminà questas lavurs. Actualmain vegn il material da grip ch'è crudà sin la via veglia da Samignun rumì cun maschinas. Fin la fin da l'emprima emna da schaner èn vegnidas transportadas davent passa 3500 tonnas material.

En il fratemp ha l'Uffizi da construcziun bassa dal Grischun (UCB) terminà da registrar las mesiraziuns champestras cumplexas en il vast territori da la crudada da grippa. Las proximas emnas ston vegnir fatgas ulteriuras lavurs da segirezza en il territoir da la crudada da grippa: Fin la fin da questa emna è vegnì construì in rempar da protecziun en il sectur dal material crudà. Suenter po il terren fermamain emplenì e fitg taiss vegnir splattà giu da surengiu. Plinavant vegnan sguladas natiers pliras retegnidas da bostgs ed installadas en il territori da la crudada da grippa. Tut il material luc vegn – tant enavant sco pussaivel – allontanà, quai fin sin il nivel da la via d'Engiadina. Supplementarmain vegnan montadas duas retschas da palissadas d'atschal sur la via d'Engiadina.

Avertura probabla la fin da schaner
Pir suenter avair terminà questas lavurs da segirezza sin la spunda, po il UCB cumenzar a rumir sco er a reparar per part ils vials ed ils mirs da la vart da la muntogna e da la val. Per il traffic vegn construì in vial provisoric e vegn installada in'ampla da traffic. Il UCB fa quint da pudair dar liber la fin da schaner la via d'Engiadina per il traffic, e quai sin in vial, premess che las lavurs da construcziun progredeschian senza incaps e ch'i dettia paucas precipitaziuns fin alura sco er che las temperaturas n'arrivian betg sur il punct da schelira. Las ulteriuras lavurs per reparar la via d'Engiadina e per allontanar definitivamain il material crudà han lieu suenter che la naiv è luada, a partir da la primavaira 2024, en in manaschi cuntinuant.

Rutas alternativas e situaziun sin las vias
La via d'Engiadina è serrada tranter Vinadi ed il cunfin naziunal per il traffic da transit. Ina guntgida sur Danuder e Fuond è signalisada. La deviaziun maina sur la via Martinsbruck a Danuder e vinavant sur la via dal Reschen a Fuond. La via da Samignun davent da Vinadi fin Samignun Vitg è averta..

Infurmaziuns actualas chattais Vus da tut temp sut www.strassen.gr.ch.

Fotografia agiuntada:

Allontanament dal material crudà e construcziun dal rempar da protecziun sin la via veglia da Samignun

Infurmaziuns:

Rafael Da Silva, schef dal district 4 Scuol, Uffizi da construcziun bassa, tel. +41 81 257 69 57 (cuntanschibel da las 14.00 fin las 16.00)

Responsabladad: Uffizi da construcziun bassa