Mesemna, ils 7 da favrer 2024, han lieu en tut la Svizra ils tests annuals da las sirenas «alarm general» a las 13.30 ed a las 13.45 sco er «alarm d'aua» a las 14.15 ed a las 15.00. Quests tests da las sirenas servan d'ina vart a controllar la prontezza da funcziun da las sirenas, e da l'autra vart po la populaziun emprender d'enconuscher ils differents signals d'alarm, cun ils quals ella vegn alarmada en cas d'in privel acut.
Alarm general
Il «alarm general» vegn activà a las 13.30. Las sirenas vegnan messas en funcziun tras in telecumond davent da la centrala d'acziuns da la Polizia chantunala a Cuira. Il «alarm general» è in tun urlant ch'è regularmain aut e bass e che dura ina minuta. Entaifer 5 minutas sa repeta quest alarm ina segunda giada. La populaziun na sto prender naginas mesiras.
A las 13.45 vegnan tut las sirenas messas en funcziun anc ina giada a maun. Quest alarm vegn activà da las vischnancas al lieu.
Alarm d'aua
Il «alarm d'aua» vegn activà en l'intschess da stabiliments d'accumulaziun a las 14.15 ed a las 15.00. I sa tracta d'in tun bass interrut regularmain che dura 6 minutas. La populaziun na sto prender naginas mesiras. Ils plans da fugia en cas d'in alarm d'aua pon vegnir consultads tar las vischnancas che sa chattan en il territori da deflussiun dals stabiliments d'accumulaziun.
Tge èsi da far, sch'i dat in dretg alarm da sirenas?
Sche l'alarm general resuna ordaifer il test da las sirenas annunzià, vul quai dir ch'ina periclitaziun da la populaziun è pussaivla. En quest cas duai la populaziun tadlar radio u s'infurmar sur ils chanals dad Alertswiss, suandar ils avis da las autoritads ed infurmar las vischinas ed ils vischins.
L'alarm d'aua inditgescha che la populaziun che viva sut in stabiliment d'accumulaziun è periclitada directamain. En quest cas duai la populaziun bandunar immediatamain il territori periclità.
Avis sur l'app Alertswiss
Parallelamain a l'activaziun da l'alarm general da sirenas activescha mintga chantun ils 7 da favrer 2024 in avis dal stgalim «infurmaziun» sur l'app Alertswiss. L'avis dal stgalim «infurmaziun» n'activescha nagin tun da sirena sin il smartphone, sco quai ch'i fiss il cas tar in avis dal stgalim «alarm».
L'app dad Alertswiss datti gratuitamain per Android e per iOS. Ella po vegnir chargiada giu da Google Play u dal App Store.
Ulteriuras infurmaziuns e reglas da cumportament chattais Vus sin la pagina d'internet da l'Uffizi federal da protecziun da la populaziun UFPP, sin la pagina d'internet dad Alertswiss sco er en il teletext dals emetturs da la SSR, sin las paginas 680 e 681.
Infurmaziuns:
Jürg Mayer, manader Protecziun civila Edifizis, tel. +41 81 257 35 46, e‑mail Juerg.Mayer@amz.gr.ch
Responsabladad: Uffizi da militar e da protecziun civila