La Regenza ha approvà la revisiun parziala da la planisaziun locala che la vischnanca da San Murezzan aveva concludì ils 12 da mars 2023. Cun quai stgaffescha ella las premissas planisatoricas per la realisaziun dal lai d'accumulaziun natiral «Nair Pitschen».

L'interpresa Engadin St. Moritz Mountains SA vul realisar il lai d'accumulaziun natiral «Nair Pitschen» cun ina surfatscha da 51 500 meters quadrat e cun in volumen d'accumulaziun da circa 300 000 meters cubic. Il lai d'accumulaziun natiral duai vegnir realisà sin circa 2620 meters sur mar. El duai vegnir emplenì annualmain sur il lai d'accumulaziun natiral «Lej Alv» cun agid da pumpas e conducts ch'èn gia installads. Per la construcziun dal nov lai d'accumulaziun natiral ston vegnir adattads vias d'access, pistas e conducts d'ennavar. Cun la realisaziun dal lai d'accumulaziun, che serva sco reservuar per l'aua d'ennavar necessaria, po er vegnir alimentà il stgalim da pressiun pli bass da l'indriz d'ennavar che sa chatta sin il territori communal da San Murezzan e da Schlarigna. Per consequenza pon ins en l'avegnir desister cumplettamain da pumpar vers ensi l'aua d'ennavar dals pumpadis d'aua sutterrana Schlattain a Schlarigna e San Gian I a San Murezzan.

© 2020 Andrea Badrutt, Cuira

La Regenza ha concedì a las Ovras electricas Glion SA (OEG) la permissiun per derschentar il lai da fermada da Pigniu. La derschentada dastga vegnir fatga a partir dals 15 da matg fin e cun ils 30 da settember 2024. Sche la realisaziun na duess betg esser pussaivla l'onn 2024, po tala vegnir spustada fin il pli tard l'onn 2028 ed er vegnir fatga tranter ils 15 da matg ed ils 30 da settember da l'onn respectiv.

Dapi ch'il lai da fermada è vegnì mess en funcziun l'onn 1992, èn s'accumulads en il lai var 169 000 meters cubic sediments che restrenschan il manaschi da l'ovra. La derschentada è gia vegnida permessa l'onn 2021 cun ina limita temporala da 3 onns. Ils ultims 3 onns n'ha quella dentant betg pudì vegnir realisada, perquai che las cundiziuns generalas per la derschentada (idrologia e livel da l'aua) n'èn betg vegnidas cuntanschidas durant quests 3 onns. Perquai ch'il termin da 3 onns per realisar la derschentada è scrudà, han las OEG inoltrà ina nova dumonda per far in'unica derschentada dal lai da fermada da Pigniu. Per augmentar la probabilitad ch'ina derschentada possia vegnir realisada, è vegnì reelavurà il concept da derschentada.

Lai da fermada da Pigniu; © AXPO / OEG (Ovras electricas Glion SA)