Per motivs da segirezza sto la via da Calanca vegnir serrada per tut il traffic a partir da venderdi, ils 9 da favrer 2024, a las 18.00, quai tranter il spartavias da Castaneda ed il spartavias da Buseno. Il motiv èn las precipitaziuns cuntinuantas, che augmentan la ristga da crudadas da crappa. L'Uffizi da construcziun bassa dal Grischun quinta da puspè pudair avrir la via dumengia, ils 11 da favrer, a las 12.00.

La via da Calanca tranter Castaneda e Buseno vegn survegliada periodicamain cun radar. Pervia da las precipitaziuns cuntinuantas exista ina ristga pli gronda, che parts dal grip instabilas pudessan sa distatgar e periclitar la via. Suenter in'examinaziun detagliada ha l'Uffizi da construcziun bassa dal Grischun (UCB) concludì da serrar per motivs da segirezza preventivamain la via per tut il traffic, quai per proteger las participantas ed ils participants dal traffic.

Tenor las prognosas da l'aura actualas sa calman las precipitaziuns la notg da sonda sin dumengia. La dumengia avantmezdi vegnan las persunas spezialisadas dal UCB ad observar exactamain la situaziun. Actualmain partan ellas dal fatg, che la via po puspè vegnir averta dumengia, ils 11 da favrer, a las 12.00.

Ils vitgs al nord da Bivio Castaneda n'èn betg cuntanschibels durant quest temp. Durant che la via è serrada, na datti nagina pussaivladad da sviar. Infurmaziuns actualas chattais Vus da tut temp sut www.strassen.gr.ch.

Infurmaziuns:

• Stefano Ciocco, schef da manaschi dal district 2 Mesauc, Uffizi da construcziun bassa dal Grischun, tel. +41 76 330 17 81
  
• Andrea Peduzzi, schef dal district 2 Mesauc, Uffizi da construcziun bassa dal Grischun, tel. +41 79 436 53 16 (cuntanschibel fin sonda, ils 10 da favrer, a las 17.00)