En il rom dal giubileum da «500 onns Stadi liber da las Trais Lias» ha il president da la Regenza Jon Domenic Parolini envidà classas dal stgalim superiur da far ina visita al Cussegl grond ed en la Chasa grischa. L'eveniment istoric per il Grischun vegn prendì sco chaschun per intermediar als giuvenils la valur da noss stadi democratic e da svegliar lur interess per la politica.
«Al puls politic – en contact direct cun la democrazia» – sut quest motto ha il president da la Regenza Jon Domenic Parolini envidà classas dal stgalim superiur da tut il Grischun da visitar ina sessiun dal Cussegl grond e da vegnir a guardar la Chasa grischa. La finamira da questa experientscha da furmaziun speziala è quella da promover la chapientscha dals giuvenils per process politics sco er lur interess per la debatta democratica. «En il rom da mia lavur vuless jau avischinar ils giuvenils a la politica. Il giubileum da «500 onns Stadi liber da las Trais Lias» porscha in rom optimal per quai», motivescha Jon Domenic Parolini sia iniziativa.
L'interess per l'invit dal president da la Regenza è stà fitg grond. Circa 50 scolas da tut las regiuns dal chantun han annunzià lur participaziun. Tranter las emprimas scolas che han fatg la visita èn stadas las scolas da la Lumnezia e da Sursaissa. Ellas han persequità oz plain interess il travasch politic en il Cussegl grond. Las deputadas ed ils deputads da las regiuns e dals circuls electorals respectivs han mintgamai retschavì ed accumpagnà las classas. Il di è vegnì terminà cun ina visita en la Chasa grischa, nua ch'il president da la Regenza ha manà ils giuvenils en moda cumpetenta tras l'edifizi. Il president da la Regenza sa legra dal grond interess per il manaschi parlamentar e per la lavur politica.
Fotografia agiuntada:
Scolaras e scolars da las scolas da la Lumnezia e da Sursaissa davant l'edifizi dal Cussegl grond
Infurmaziuns:
President da la Regenza dr. Jon Domenic Parolini, e‑mail Jondomenic.Parolini@ekud.gr.ch
Responsabladad: Departament d'educaziun, cultura e protecziun da l'ambient