Sin invit da la Regenza ha l'ambassadur ungarais, József Czukor, visità oz il chantun Grischun.

L'ambassadur József Czukor è vegnì beneventà oz en la Chasa grischa a Cuira dal president da la Regenza Jon Domenic Parolini e dal chancelier Daniel Spadin. L'ambassadur è vegnì accumpagnà da Csaba Piszter, l'attasché per l'economia exteriura, e Zsófia Nógrádi-Barkaszi, l'emprima collavuratura. Suenter il barat dals salids uffizials è in gentar cuminaivel stà sin il program.

La Regenza grischuna tgira annualmain contacts cun represchentantas e represchentants da stadis esters en Svizra. Ils discurs èn elements impurtants da las relaziuns externas dal chantun. Cun ils stadis vischins e cun ils pajais che han relaziuns spezialas cun la Svizra e cun il Grischun vegnan discutadas savens dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

Da sanestra: Il chancelier Daniel Spadin, Zsófia Nógrádi-Barkaszi, l'ambassadur dr. József Czukor, il president da la Regenza dr. Jon Domenic Parolini e Csaba Piszter

Infurmaziuns:

president da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch