Il venderdi, ils 23 da favrer 2024, èn s'inscuntrads represchentantas e represchentants da las vischnancas da la Val Calanca, da l'Uffizi da guaud e privels da la natira (UGP) sco er da l'Uffizi da construcziun bassa dal Grischun (UCB) ad in barat constructiv. En il focus èn stads l'ulteriur proceder areguard la segirezza e la disponibladad da la via da Calanca sco er la communicaziun tranter ils uffizis chantunals e las vischnancas.

Cunzunt sin il traject tranter l'access da Castaneda e la gallaria Segheria Buseno è la via da Calanca periclitada fermamain da crudadas da crappa. Ils ultims 30 onns èn gia vegnids investids 25 milliuns francs per segirar la via en la val Calanca – tuttina è il privel sin tscherts trajects anc oz augmentà.
Er durant la sessiun da favrer dal Cussegl grond è la via chantunala stada in tema cun la incumbensa da la deputada da l'Allianza dal Center Rosanna Spagnolatti: Il Cussegl grond ha surdà l'incumbensa per augmentar la segirezza unanimamain a la Regenza. Il venderdi èn las represchentantas ed ils represchentants da las vischnancas da la val Calanca, dal UGP sco er dal UCB sa barattads intensivamain en chaussa.

Differentas mesiras vegnan gia realisadas a partir da la primavaira 2024
Uschespert che la situaziun permetta quai, vegn il UCB a prender – en collavuraziun cun il UGP – immediatamain differentas mesiras per augmentar la segirezza e la disponibladad sin il traject tranter l'access da Castaneda fin a la Segheria Buseno. Las persunas spezialisadas èn optimisticas da pudair allontanar l'avrigl in toc grip instabil tar l'access Buseno. Il cumenzament exact da questas lavurs dependa da las relaziuns climaticas: Uscheditg che la crappa è instabila pervia da proceduras da schelira e da sdregliada sco er pervia da precipitaziuns en furma da plievgia u naiv, è l'access als lieus critics privlus e la segirezza per las lavurantas ed ils lavurants n'è betg garantida. Gia dapi il cumenzament da l'onn è in rempar da protecziun tar la colliaziun Buseno sco er l'installaziun da raits da protecziun per proteger quest plazzal en planisaziun. Questas lavurs duain medemamain vegnir realisadas anc quest onn.
Sco mesira a media vista vegnan quest onn supplementarmain er allontanads, segirads e survegliads plirs grips instabils en la paraid-crap sur la via da Calanca ch'è passa 300 meters auta. La planisaziun da questa mesira pretensiusa è dapi l'atun 2023 en lavur. La realisaziun vegn a durar almain fin il 2025.

Tunnel dad 1,4 kilometers sco varianta pussaivla per garantir la segirezza
Sco pretendì en l'incumbensa Spagnolatti vegn il UCB ad elavurar differentas variantas per gallarias e soluziuns da tunnel sco mesiras a lunga vista. Emprimas enconuschientschas han gia mussà, ch'in tunnel stuess esser var 1,4 kilometers lung per avair in effect da protecziun optimal. L'orizont da realisaziun da talas ovras da protecziun importa per regla passa 10 onns. Fin che quellas pudessan vegnir messas en funcziun, èn dentant necessarias mesiras supplementaras per augmentar la segirezza. Questas mesiras pon vegnir realisadas entaifer pauc temp.

In barat regular per ina communicaziun transparenta
Fin che las emprimas lavurs èn realisadas la primavaira 2024, n'èsi betg exclus, ch'i vegn a dar en cas excepziunals serradas a curta vista. Il UCB vegn ad annunziar quellas cun uschè bler temp da preparaziun sco pussaivel ed ad integrar las vischnancas gia ordavant en la procedura da decisiun. Ultra da quai duai avair lieu en il futur in barat regular tranter il chantun e las vischnancas per garantir ina communicaziun transparenta ed averta.

Infurmaziuns:

• Reto Knuchel, inschigner chantunal, Uffizi da construcziun bassa dal Grischun, tel. +41 81 257 37 01 / +41 79 629 81 14 (cuntanschibel venderdi, ils 23 da favrer da las 16.00 fin las 18.00 e glindesdi, ils 26 da favrer da las 10.00 fin las 11.00), e‑mail Reto.Knuchel@tba.gr.ch
• Rosanna Spagnolatti, deputada da la Calanca, tel. +41 79 478 43 07 (cuntanschibla venderdi, ils 23 da favrer da las 16.30 fin las 18.30 e glindesdi, ils 26 da favrer da las 10.30 fin las 12.00), e‑mail spagnolattirosanna@gmail.com