La quota da dunnas en la politica communala stagnescha. Co po la participaziun vegnir meglierada? Tgi è responsabel ch'i capitia insatge? L'occurrenza «Dunnas e politica: Schanzas e sfidas per la regiun Engiadina Bassa Val Müstair» ils 12 da mars 2024 a Scuol sondescha las schanzas e las sfidas per la regiun.

«14 presidentas – 14 pertschient», quai è la cumpart da las dunnas il 1. da schaner 2024 en las executivas sin plaun communal. La valur stagnescha dapi onns, sche betg decennis. Dapi l'onn 2022 eruescha l'Uffizi da vischnancas annualmain la represchentanza da dunnas en la politica communala. Sulettamain en ils parlaments è la quota da dunnas creschida marginalmain durant quests trais onns per 2,8 sin 24,6 pertschient (Registraziun 2024).
En la regiun Engiadina Bassa-Val Müstair èn dus da tschintg presidis communals en mauns da dunnas e pia bler dapli ch'en la media grischuna. Questas duas presidentas communalas, Aita Zanetti, Scuol, e Gabriella Binkert-Becchetti, Val Müstair, envidan ussa la populaziun ed ulteriuras persunas interessadas da sondar cuminaivlamain cun il Post da stab per l'egualitad da las schanzas e cun il Center per management d'administraziun (CMA) da la Scola auta spezialisada dal Grischun (SASGR) las schanzas e las sfidas da e per dunnas en la politica.

Rinforzar las vischnancas
L'occurrenza «Dunnas e politica» ils 12 da mars 2024 en la sala communala da Scuol metta en discussiun las mesiras da la plattafurma PROMO Femina. Las mesiras èn vegnidas sviluppadas 2021–2022 en il project da perscrutaziun cun il medem num, purtadas da la SASGR cun sustegn dal Post da stab per l'egualitad da las schanzas sco er d'ulteriurs quatter chantuns. Igl è la segunda staziun da la «PROMO Femina on Tour» suenter Soglio il schaner 2023 (rapport qua).
La retscha è ina contribuziun per garantir l'engaschament civil e vischnancas che funcziunan. Sin quest plaun ch'è il pli datiers da las burgaisas e dals burgais, vegnan prendidas decisiuns politicas impurtantas che influenzeschan directamain la vita da mintgadi. A medem temp ha var la mesadad da las vischnancas en il Grischun difficultadas da chattar candidatas e candidats adattads per occupar ils uffizis. La raschun per quai è d'ina vart il grond dumber d'uffizis communals. E da l'autra vart sa reducescha tendenzialmain la prontezza da la populaziun da surpigliar in engaschament formal ed en uffizi d'onur. «Sch'ins gudagnass dapli dunnas per la politica communala, fiss quest plaun politic impurtant rinforzà», declera Barbara Wülser, manadra dal Post da stab per l'egualitad da las schanzas. Ulteriuras infurmaziuns ed annunzia sut promofemina.fhgr.ch

Discutar aspectativas e perspectivas
A l'occurrenza «Dunnas e politica: Schanzas e sfidas per la regiun Engadina Bassa Val Müstair» che ha lieu mardi, ils 12 da mars 2024 en la sala communala da Scuol da las 17.00 fin las 20.00, discuta per l'ina la presidenta communala da Scuol en uffizi, Aita Zanetti, cun dunnas giuvnas interessadas a la politica davart las perspectivas e las aspectativas che vegnan purschidas a dunnas en la politica. Per l'autra discutan las participantas ed ils participants en in spazi moderà avert davart las pussaivladads che la regiun dovra e porscha. La participaziun è gratuita ed è averta per tut las persunas interessadas. I vegn giavischà da s'annunziar sut quest link. Il project vegn sustegnì dal chantun Grischun sco er da las vischnancas Scuol e Val Müstair.

Fotografias agiuntadas:

Plazza communala da Scuol © Andrea Badrutt

Fotografia d'enviern regiun Engiadina Bassa © Andrea Badrutt

Infurmaziuns:

Barbara Wülser, manadra dal Post da stab per l'egualitad da las schanzas, tel. +41 81 257 35 71 (cuntanschibla da las 8.30 fin las 10.00, da las 13.30 fin las 15.00 e da las 16.30 fin las 17.30), e‑mail Barbara.Wuelser@stagl.gr.ch

Responsabladad: Post da stab per l'egualitad da las schanzas