La Regenza grischuna ha approvà la cunvegna da prestaziun tranter la Confederaziun ed il chantun. La procedura da controlla da la Confederaziun pertutgant il Program d'aglomeraziun Cuira da la 4. generaziun è uschia terminada e la realisaziun da las mesiras po cumenzar. A medem temp vegnan fatgas las preparaziuns per in program successiv da la 5. generaziun.

La Confederaziun sa participescha a la finanziaziun da mesiras per meglierar l'infrastructura da traffic en citads ed en aglomeraziuns. Quai sut la premissa ch'in program d'aglomeraziun coordineschia en moda efficazia il svilup da l'abitadi e dal traffic cun la planisaziun da la cuntrada. Perquai metta er il Program d'aglomeraziun Cuira il focus sin quests secturs. Il perimeter cumpiglia las regiuns Plaun, Plessur e Landquart.

Traffic public, vias da transit tras ils lieus e rait da vias da velo en il focus
Las mesiras dal Program d'aglomeraziun Cuira da la 4. generaziun han in vast spectrum da temas ed èn repartidas sur l'entira aglomeraziun: In accent vegn mess sin fermadas dal traffic public che porschan en il futur in'auta qualitad da dimora e che duain garantir ina midada dal med da transport effizienta. Plinavant duai il traffic vegnir concepì en intginas vias da transit tras ils lieus en moda pli cumpatibla cun ils abitadis. Per quest intent èn previsas mesiras da dosagi e mesiras directivas, quai per far il traffic pli effizient e pli fluid e per reducir colonnas. In'ulteriura mesira è il meglierament da la rait da vias da velo, per exempel tras ina ruta che collia Razén e Maiavilla.

Cun la cunvegna da prestaziun ch'è ussa vegnida approvada tranter la Confederaziun ed il chantun èn vegnidas stgaffidas las premissas per pajar contribuziuns federalas da var 38,5 milliuns francs. La tariffa da contribuziun da la Confederaziun pertutgant il Program d'aglomeraziun Cuira da la 4. generaziun importa uschia 30 pertschient. Bleras da las mesiras vegnan realisadas tras las vischnancas. Perquai ch'ils daners federals concedids pon mo vegnir duvrads fin la fin da mars 2029, han la planisaziun da las finanzas e la projectaziun gia cumenzà sin nivel communal.

Proxim program d'aglomeraziun da la 5. generaziun en preparaziun
Las consequenzas dal grond volumen da traffic e la viva activitad da construcziun restan er en il futur pretensiusas. Las regiuns e las vischnancas che sa chattan en il perimeter da l'aglomeraziun sco er il chantun èn perquai sa decidids d'elavurar in program d'aglomeraziun da la 5. generaziun. Il program na vegn betg scrit tut da nov, plitost vegni lavurà vinavant vi dals temas existents. Uschia vegnan cuntinuadas l'optimaziun da las staziuns e la concepziun da vias en moda cumpatibla per ils abitadis. En tscherts puncts èn previs novs concepts, sco per exempel mesiras per il traffic da peduns e la consideraziun pli intensiva da spazis libers e da zonas verdas en ils abitadis.

Las lavurs pertutgant il program d'aglomeraziun da la 5. generaziun han cumenzà il zercladur 2023, ina consultaziun tar las vischnancas è previsa il settember 2024, l'integraziun da la populaziun è planisada il schaner 2025. L'inoltraziun a la Confederaziun sto vegnir fatga fin ils 30 da zercladur 2025.

Agiunta:

Infurmaziuns davart il program d'aglomeraziun da la 4. generaziun

Visualisaziun:

Infurmaziuns:

• Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, e‑mail Carmelia.Maissen@diem.gr.ch
• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 09.00 fin las 10.30), e‑mail Reto.Knuchel@tba.gr.ch
• Boris Spycher, projects spezials, Uffizi per il svilup dal territori, tel. +41 81 257 23 06 (cuntanschibel da las 08.30 fin las 12.30), e‑mail Boris.Spycher@are.gr.ch