La Regenza grischuna ha nominà Arno Lombardini sco nov manader da l'Inspecturat dal register funsil e register da commerzi (IRFRC). El vegn a surpigliar questa funcziun il 1. da schaner 2025.

Arno Lombardini è engaschà dapi l'onn 2005 tar l' IRFRC sco administratur dal register da commerzi e dapi l'onn 2011 er sco substitut dal manader da l'uffizi. Avant ha il giurist d'Andeer da 52 onns lavurà sco advocat independent ed è stà president cirquital da l'anteriur circul da Schons.

Arno Lombardini daventa successur da Ludwig Decurtins che va ils 31 da december 2024 en la pensiun bain meritada suenter passa 37 onns en il servetsch dal chantun e suenter 22 onns en questa funcziun.

L'IRFRC è in post da servetsch dal Departament d'economia publica e fatgs socials (DES). Il manader da l'uffizi è suttamess directamain al schef dal DES e maina in team da 14 collavuraturas e collavuraturs. L'IRFRC inspectescha ils uffizis ed ils notariats dal register funsil, maina il register da commerzi ed exequescha la legislaziun federala davart il dretg funsil puril e davart l'acquist da bains immobigliars tras persunas da l'exteriur.

Fotografia agiuntada:

Infurmaziuns:

Cusseglier guvernativ Marcus Caduff, schef dal Departament d'economia publica e fatgs socials, e‑mail Marcus.Caduff@dvs.gr.ch

Responsabladad: Regenza