Represchentantas e represchentants da la Confederaziun, dals chantuns, da las regiuns e da las vischnancas èn sa scuntrads gievgia, ils 14 da mars 2024, per la tschintgavla maisa radunda davart il tema traffic da guntgida per lung da la A13 e da la A28. Las mesiras d'enfin ussa èn sa cumprovadas e vegnan cuntinuadas en il medem rom.

La finamira principala da las mesiras prendidas fin ussa per lung da la A13 e da la A28 è d'impedir colonnas en ils vitgs pertutgads dal traffic da guntgida sco er da garantir la circulaziun da las organisaziuns a glisch blaua e dal traffic public entaifer ils vitgs. Questa finamira è vegnida cuntanschida ils ultims mais d'enviern e da stad.

Retrospectiva sin il manaschi d'enviern en il Partenz
Durant trais da quatter fin d'emnas il schaner ha l'Uffizi da construcziun bassa dal Grischun (UCB) prendì differentas mesiras en collavuraziun cun la Polizia chantunala dal Grischun e cun l'Uffizi federal da vias (UVIAS) per reducir il traffic da guntgida en il Partenz Davant. Quai cuntrari a l'emprima valitaziun da l'ultim atun, tenor la quala las mesiras fissan pir stadas previsas a partir dal favrer fin mez mars 2024. L'aura sulegliva e las bunas cundiziuns da naiv avevan procurà per in pli grond volumen da traffic ch'il schaner 2023. Grazia al dispositiv che po vegnir duvrà en moda flexibla per lung da la A28 èsi stà pussaivel da reagir a curta vista al grond volumen da traffic e las mesiras respectivas vegnir introducidas gia pli baud che planisà (vesair communicaziun a las medias dals 13-10-2023). Ils dis da Pasca dals 29 da mars fin il 1. d'avrigl 2024 sa chattan er quest onn anc en la stagiun da sport d'enviern. Per quest motiv vegn il UCB ad applitgar danovamain las mesiras la fin d'emna da Pasca per lung da la A28.

Mesiras cumprovadas per il traffic da firads e da vacanzas
Perquai ch'er las mesiras realisadas la primavaira/stad 2023 per lung da la A13 èn sa cumprovadas, vegn il UCB ad utilisar in dispositiv cumparegliabel sco l'onn passà cunzunt ils firads da primavaira (Pasca, Ascensiun, Tschuncaisma) sco er las fins d'emna il cumenzament da fanadur.

Il dispositiv s'extenda vers sid – tut tenor il volumen da traffic – da Zizers fin al tunnel Isla Bella. Per il traffic da return che charrescha en direcziun nord èn las mesiras medemamain previsas ils firads da primavaira sco er las fins d'emna l'avust.

Il cumportament da las participantas e dals participants dal traffic ha gronda consequenza
Il UCB recumonda a las participantas ed als participants dal traffic d'evitar las uras da grond traffic quels dis ch'in grond volumen da traffic è previsibel u d'insumma evitar quels dis. Quai pertutga cunzunt il traffic da return en direcziun nord. Da princip recumonda il UCB da sviar al traffic public sin binaris.

Midada d'utilisaziun dal vial da panna ed armonisaziun da sveltezza
Sco mesira a media vista planisescha il UVIAS la midada d'utilisaziun dal vial da panna tranter Landquart e Sargans. Il diever temporar dal vial da panna sco terz vial duai mitigiar la situaziun cunzunt per il traffic da return che charrescha l'enviern en direcziun nord. Ultra da quai èn previsas in'armonisaziun da la sveltezza ed ina installaziun per infurmaziuns da privel tranter Sargans e Tusaun en omaduas direcziuns. La pussaivladad da pudair reducir la sveltezza maximala en cas da basegn, procura per ina circulaziun dal traffic cun pli paucs disturbis ed ha per consequenza che la capacitad da la A13 po vegnir tratga a niz meglier. Ultra da quai reducescha ella las manevras andetgas da franar e las midadas da vial nunnecessarias che mainan a colonnas.

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 10.00 fin las 11.00), e‑mail Reto.Knuchel@tba.gr.ch
• Andreas Pöhl, manader Gestiun dal traffic, Uffizi da construcziun bassa dal Grischun, tel. +41 81 257 37 62 (cuntanschibel da las 08.00 fin las 11.00), e‑mail Andreas.Poehl@tba.gr.ch