Ina cumissiun ad hoc dal Cussegl grond ha predeliberà la missiva tar la construcziun d'in nov edifizi per il center d'instrucziun da la protecziun civila al Meiersboda a Churwalden. Ella sustegna unanimamain il project da construcziun necessari e persistent.
Sut la direcziun da la presidenta da la cumissiun Sandra Maissen ha la cumissiun predeliberanta laschà preschentar ils plans per il nov edifizi tras la cussegliera guvernativa cumpetenta Carmelia Maissen, scheffa dal Departament d'infrastructura, energia e mobilitad, sco er tras Pascal Porchet, manader da l'Uffizi per militar e da protecziun civila, e tras l'architect chantunal Andreas Kohne. En quest connex è d'ina vart vegnida renconuschida la necessitad ord vista dal manaschi e da la segirezza. Da l'autra vart ha la cumissiun pudì sa persvader da la funcziunalitad da la realisaziun architectonica. La nova basa previsa custa la finala 18,95 milliuns francs.
Infrastructura moderna e flexibla per in manaschi effizient
Per pudair surmuntar er en l'avegnir en moda segira crisas adina pli cumplexas e per pudair garantir la prontezza a l'acziun sco er la capacitad d'intervenziun da la protecziun da la populaziun, èsi indispensabel d'avair en il cas concret ina infrastructura che correspunda als basegns. En la cumissiun n'hai dà nagins dubis, ch'il nov edifizi modern porschia l'infrastructura e la flexibilitad d'utilisaziun necessaria per pudair ademplir cumplainamain ses intent. Er la realisaziun che considerescha in manaschi effizient sco er la persistenza da l'edifizi cumpensatoric, ha la cumissiun sustegnì cumplainamain. Ella propona unanimamain al Cussegl grond d'entrar en il project e d'approvar tal.
Il Cussegl grond vegn a tractar questa fatschenta en la sessiun d'avrigl 2024. Premess ch'il Cussegl grond dettia ses consentiment, vegnan las votantas ed ils votants a vuschar ils 22 da settember 2024 davart l'edifizi cumpensatoric.
Visualisaziun:
© atelier tsu / bersa / Tao Architects Office, Cuira
Infurmaziuns:
Presidenta da la cumissiun Sandra Maissen, tel. +41 79 507 01 77 (cuntanschibla da als 14.30 fin las 15.30)
Responsabladad: Cussegl grond / cumissiun predeliberanta ad hoc