Suenter Pasca cumenza la stagiun da construcziun 2024. Sin la rait da vias chantunalas d'ina lunghezza da stgars 1360 kilometers ha l'Uffizi da construcziun bassa dal Grischun planisà tut en tut 151 plazzals. Sin 100 da quests plazzals èn endrizzadas amplas da traffic.

Cun 151 plazzals planisescha l'Uffizi da construcziun bassa dal Grischun (UCB) quest onn damain plazzals che durant la stagiun da construcziun passada dal 2023. En general sa reducescha il dumber da plazzals levamain, ma cuntinuadamain dapi ils ultims 8 onns. La raschun è ch'ils projects èn tendenzialmain pli gronds e pli chars, uschia ch'i vegnan mintgamai liads dapli meds finanzials al singul plazzal.

Durant questa stagiun stattan trais projects da vias principalas pli gronds en il focus: la construcziun da la nova punt «Spuondas» a San Murezzan sco er duas correcziuns da vias sin ils trajects «Alpenrose – Tschuggen» al pass dal Flüela e «Marcau – Seehof» a Laax. L'Uffizi da construcziun bassa dal Grischun sa stenta da minimar tant sco pussaivel las restricziuns dal traffic e da resguardar particularmain il temp da vacanzas principal durant la stad.

Temp per segirezza: paucas secundas, vita custaivla
L'emprima prioritad ha la segirezza da las lavurantas e dals lavurants sin ils plazzals. Quai na vul betg mo dir che las disposiziuns per la protecziun da las lavurantas e dals lavurants stoppian vegnir observadas, mabain en spezial er che las participantas ed ils participants dal traffic prendian il resguard necessari. Davos las barricadas lavuran umans, cun la finamira da meglierar l'infrastructura per tuts. Sche las participantas ed ils participants dal traffic sa cuntegnan cun respect, pussibiliteschan ellas ed els a questas persunas da lavurar en moda segira. Per traversar il sectur dal plazzal supplitgescha il UCB perquai las participantas ed ils participants dal traffic d'adattar la sveltezza, d'augmentar l'attenziun, da tegnair ina distanza suffizienta da las barricadas e d'observar en mintga cas las amplas da traffic sco er las ordinaziuns dal persunal dal plazzal e dal servetsch da traffic.

Actualisaziun permanenta sin strassen.gr.ch
Infurmaziuns actualas davart las restricziuns en connex cun plazzals e davart las lavurs vegnan publitgadas cuntinuadamain sin la pagina d'internet strassen.gr.ch e stattan a disposiziun sco charta interactiva u sco glista da PDF.

Ulteriurs detagls davart ils projects e davart l'effect dal UCB sin il clima
La pli nova Info dal UCB cuntegna infurmaziuns detagliadas davart las lavurs che l'Uffizi da construcziun bassa dal Grischun realisescha en il rom dals trais projects da vias principalas numnadas qua survart. Ultra da quai vegnan preschentads l'effect dal UCB sin l'ambient sco er ils facturs d'influenza ch'èn ecologicamain relevants per l'activitad dal UCB, per exempel tge sectur che chaschuna las pli grondas emissiuns da gas cun effect da serra.

Fotografia agiuntada:

Sche las participantas ed ils participants dal traffic sa cuntegnan cun respect en il sectur dal plazzal, augmenta quai la segirezza dal persunal dal plazzal e dal servetsch da traffic.

Agiunta:

Info dal UCB

Infurmaziuns:

• Reto Knuchel, inschigner chantunal, Uffizi da construcziun bassa, tel. +41 81 257 37 01 (cuntanschibel da las 09.00 fin las 11.00), e‑mail Reto.Knuchel@tba.gr.ch
• Roger Stäubli, schef Construcziun da vias / substitut da l'inschigner chantunal, Uffizi da construcziun bassa, tel. +41 81 257 38 42 (cuntanschibel da las 08.00 fin las 10.00), e‑mail Roger.Staeubli@tba.gr.ch

Responsabladad: Uffizi da construcziun bassa