La Regenza ha concedì ina contribuziun da 620 000 francs a Grischun Vacanzas en il rom da la Nova politica regiunala da la Confederaziun (NPR) per il project «Program da svilup graubünden Nordic». Las contribuziuns NPR vegnan surpigliadas mintgamai per la mesadad da la Confederaziun e dal chantun. Per quest project èn budgetads custs totals da 2,18 milliuns francs.

Cun il «Program da svilup graubünden Nordic» vul Grischun Vacanzas ch'il chantun Grischun daventia la regiun da ski nordic la pli enconuschenta ed appreziada en il territori alpin. Participadas decisivamain a la realisaziun dal project èn er las organisaziuns da las destinaziuns Tavau Claustra, Lai, Engiadina Bassa ed Engiadin'Ota sco er Sedrun Mustér. La finamira è da posiziunar il chantun sco regiun da ski nordic predominanta sco er da rinforzar e da render enconuschent cuminaivlamain la purschida da passlung da las destinaziuns turisticas. En quest senn duai la purschida daventar anc pli attractiva tras la concentraziun d'elements singuls a products concrets. La colliaziun tranter loipas da passlung variadas, ina buna infrastructura, ina signalisaziun raschunaivla ed hotels da passlung duai porscher als giasts la basa per in'aventura da passlung attractiva. En il center stat il giudiment da passlung sco sport da massa. En il rom dal project duai plinavant vegnir sviluppada l'applicaziun digitala «Nordic-Buddy», che duai remplazzar l'applicaziun actuala «Alle laufen lang» da la «Themenallianz Nordic».

© Stefan Schlumpf

La Regenza ha approvà in project per curreger ina part da la via da Ladir a Glion. Il traject pertutgà ha ina lunghezza da var 540 meters. Tranter la rundella Glion Vest e Grüneck vegn tranter auter renovada la surstructura sco er curregida la geometria da la via en ils secturs stretgs e nunsurvesaivels.

Cun la renovaziun da la via da Ladir èsi ultra da quai planisà da construir in nov passape tras la vischnanca dad Ilanz/Glion. Quel maina davent da la garascha Spescha fin la fin dal project. En enclegientscha cun la vischnanca dad Ilanz/Glion vegn plinavant la fermada da bus actuala dischlocada e posiziunada da nov a la Via Sontga Clau Sura, ina via communala che sto vegnir renovada. La fermada da bus actuala al spartavias da la via communala per Schnaus vegn abolida. Igl è previs da servir la nova fermada da tuttas duas varts da la via, quai sco fermada sin via cun ina insla da separaziun. Uschia n'èsi betg pussaivel da surpassar ils bus durant che las passagieras ed ils passagiers entran e sortan, quai che meglierescha la segirezza da las pedunas e dals peduns. Ils custs totals dal project importan 5,94 milliuns francs e vegnan surpigliads per gronda part dal chantun. Ils custs dals stabiliments per la vischnanca dad Ilanz/Glion (fermada da bus, passapes, insla da separaziun ed access Via Sontga Clau Sura) èn budgetads cun var 1,44 milliuns francs. A la construcziun da las fermadas sin la via sa participescha il chantun cun 52 800 francs, quai sin basa da la Lescha davart l'egualitad da persunas cun impediments.

La Regenza ha garantì ina contribuziun chantunala da 593 000 francs a l'uniun eSANITA per il project digital «Process d'avertura digitalisà DEP ed e modul da vaccinaziun». Ella ha deliberà questa contribuziun en il rom da la Lescha davart la promoziun da la transfurmaziun digitala en il Grischun. Ils custs d'investiziun e da manaschi dal project importan tut en tut var 1,58 milliuns francs.

Cun il project ha l'uniun eSANITA la finamira, che l'entir process per avrir in dossier electronic dal pazient (DEP), inclusiv identitad electronica (e ID), saja pussaivel online. Il dossier electronic dal pazient è in project da sanadad publica (public health) da la Confederaziun e dals chantuns, che pussibilitescha a las pazientas ed als pazients in access digital a las atgnas datas da sanadad. La realisaziun e la finanziaziun è en emprima lingia chaussa dals chantuns e da lur furniturs da prestaziuns medicinalas, perquai ch'els èn er responsabels per l'organisaziun dals fatgs da sanadad. Il project da l'uniun eSANITA vul pussibilitar d'avrir in DEP en il Grischun senza stuair sa preschentar persunalmain tar in post da registraziun. Quest process duai pia esser disponibel en moda facila ed effizienta en tut las regiuns dal chantun. Per augmentar l'attractivitad dal DEP duai er il «e‑modul da vaccinaziun» vegnir integrà en il DEP. Quest modul è disponibel da nov sin basa da la lescha e remplazza dal tuttafatg l'attest da vaccinaziun fisic d'enfin ussa.

Ulteriuras infurmaziuns: https://grdigital.digital

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel dumengia, ils 9 da zercladur 2024:

• Iniziativa dal pievel dals 23 da schaner 2020 «Maximalmain 10 % da las entradas per las premias da las cassas da malsauns (Iniziativa da distgargia da las premias)»
• Iniziativa dal pievel dals 10 da mars 2020 «Per premias pli bassas – Frain dals custs en la sanadad publica (Iniziativa dal frain dals custs)»
• Iniziativa dal pievel dals 16 da december 2021 «Per la libertad e l'integritad corporala»
• Lescha federala dals 29 da settember 2023 davart in provediment d'electricitad segir cun energias regenerablas (midada da la Lescha d'energia e da la Lescha davart il provediment d'electricitad)

Sin plaun chantunal n'èn previs nagins projects da votaziun ils 9 da zercladur 2024.