A Milaun è la Regenza grischuna vegnida beneventada oz dal president da la regiun Lumbardia. En il center da l'inscunter èn stads differents temas transcunfinals sco er il rinforzament dal dialog instituziunal tranter il Grischun e la Lumbardia.
En il Palazzo Lombardia a Milaun (Italia) è la Regenza grischuna vegnida retschavida dal president da la regiun Lumbardia Attilio Fontana e dal commember da la Regenza Massimo Sertori, minister per autoritads localas, muntognas, resursas d'energia e d'aua.
L'inscunter ha purschì l'occasiun per approfundar temas transcunfinals tranter la Lumbardia ed il Grischun, en spezial differentas dumondas en connex cun la realisaziun dals Gieus olimpics d'enviern 2026 sco er cun la tematica pertutgant las cunfinarias ed ils cunfinaris. Medemamain èn las participantas ed ils participants s'infurmads davart il stadi da realisaziun dals projects d'Interreg Italia–Svizra sco er davart las pussaivladads d'intensivar sin differents plauns il dialog instituziunal tranter il Grischun e la Lumbardia. Quest ultim aspect exprima er il punct central da svilup en il program da la Regenza 2025-2028, che ha la finamira da promover e da rinforzar la cooperaziun transcunfinala.
Ultra da quai ha la Regenza grischuna profità da l'occasiun per preschentar als vischins talians las activitads en connex cun il giubileum da 500 onns Stadi liber da las Trais Lias. Il giubileum istoric vegn celebrà l'atun, ed il Grischun envida cordialmain la Lumbardia da sa participar a las festivitads.
La visita da la Regenza grischuna en la Lumbardia accentuescha la collavuraziun impurtanta sco er la stretga colliaziun tranter il chantun e la regiun. Il rinforzament dal dialog instituziunal e l'approfundaziun da la collavuraziun transcunfinala èn stads en il center da questa visita ed han confermà las relaziuns existentas tranter ils dus vischins.
Fotografia agiuntada:
Infurmaziuns:
President da la Regenza Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 12, e‑mail Jondomenic.Parolini@ekud.gr.ch
Responsabladad: Regenza