A maun d'ina erupziun fictiva d'ina epidemia d'animals regiunala han ils chantuns Glaruna e Grischun controllà quant bain che lur scenaris da crisa funcziunan. Per quest intent ha l'Uffizi per la segirezza da victualias e per la sanadad d'animals (USVA) ensemen cun l'Uffizi da militar e da protecziun civila (UMPC) e cun la Divisiun principala da militar e da protecziun civila dal chantun Glaruna simulà ina erupziun da la grippa d'utschels en trais manaschis cun tegnida da giaglinom. Quest exercizi ha gì lieu dals 8 fin ils 12 d'avrigl 2024 en las vischnancas Vaz Sut, Cazas ed Alvra.

La controlla da las resursas materialas e persunalas, la collavuraziun cun differentas organisaziun da protecziun civila e cun partenaris da la protecziun da la populaziun sco er la minimaziun dals donns cun agir en moda svelta e correcta èn stadas las finamiras principalas da l'acziun.

Cun satisfacziun èsi vegnì constatà che tut las persunas participadas han ademplì fitg bain lur incumbensas e che l'exercizi da cumbatter epidemias ha pudì vegnir realisà cun success. En cooperaziun cun las autoritads, cun la protecziun civila, cun la firma da dismessa, cun partenaris privats e cun las possessuras ed ils possessurs d'animals è il cas d'epidemia vegnì exercità en moda realistica, e quai en tut ils secturs. Ina giada dapli èsi sa mussà, che las enconuschientschas che resultan d'in tal exercizi èn fitg utilas ed impurtantas per planisar futuras acziuns.

Epidemia d'animals cun grevas consequenzas
L'influenza aviaria (grippa d'utschels) tutga tar las epidemias d'animals cun las consequenzas las pli grevas sin l'entir mund. Ils donns na pertutgan betg mo ils animals e l'agricultura, els han consequenzas bler pli vastas. Persunas che vivan en stretg contact cun giaglinom pon survegnir questa malsogna.

Ils ultims 3 onns è la grippa d'utschels sa mussada tar plirs millis d'utschels selvadis en l'Europa. Er en Svizra datti adina puspè cas da questa malsogna. Il virus è sa midà: adina dapli spezias da giaglinom e d'utschels s'infecteschan. En Svizra è la ristga ch'il virus vegnia importà spezialmain gronda durant l'enviern, cura che utschels migrants da l'Europa dal nordost arrivan en il pajais. Pertutgadas èn tut las spezias d'utschels, cunzunt giaglinas e galdins. Infecziuns mainan tar il giaglinom da niz per il solit a clers indizis da la malsogna. Utschels da l'aua sco p.ex. andas ed aucas s'infecteschan darar e main grev.

Temp da reacziun e rutina sco clav da success
Sch'ina epidemia d'animals fitg contagiusa vegn percepida baud, pon ins prender pli sistematicamain mesiras per minimar u schizunt evitar ina derasaziun. L'observaziun dals animals tras la pura u il pur, in cumportament correct da la veterinaria u dal veterinari e la surveglianza dal traffic da persunas e d'animals giogan ina rolla decisiva en in cas serius. L'Uffizi per la segirezza da victualias e per la sanadad d'animals (USVA) e las organisaziun da protecziun civila dals dus chantuns Grischun e Glaruna organiseschan perquai exercizis per esser preparads per il cas d'urgenza.

Collavuraziun sco pitga per cumbatter epidemias d'animals
Las veterinarias ed ils veterinaris uffizials dal USVA èn scolads per sclerir epidemias d'animals fitg contagiusas ed equipads cun ina valisch per cumbatter epidemias d'animals. Ellas ed els examineschan ils animals, prendan provas da labor per confermar la diagnosa, sclereschan moviments dals animals ed ordineschan mesiras da bloccada per la tratga d'animals pertutgada.

Ils pioniers da cumbat cunter epidemias da las organisaziuns da protecziun civila dals chantuns Grischun e Glaruna realiseschan las mesiras da bloccada al lieu, surveglian quellas, sustegnan il USVA da mazzar e da dismetter ils animals infectads, nettegian e dischinfecteschan las localitads e las surfatschas entaifer il territori bloccà. L'acziun è ina grevezza fisica e psichica fitg gronda per ils pioniers che cumbattan epidemias.

Fotografias agiuntadas:

Ulteriuras fotografias: https://pcloud.gr.ch/s/KpB667oq7KmgeDg

Infurmaziuns:

• Dr. Giochen Bearth, veterinari chantunal e manader da l'Uffizi per la segirezza da victualias e per la sanadad d'animals, tel. +41 81 257 24 11 (cuntanschibel da las 13.00 fin las 14.30), e‑mail Giochen.Bearth@alt.gr.ch
• Pascal Porchet, manader da l'Uffizi da militar e da protecziun civila, tel. +41 81 257 35 22 (cuntanschibel da las 08.30 fin las 17.00), e‑mail Pascal.Porchet@amz.gr.ch
• Thomas Gabathuler, manader da la Divisiun principala da militar e da protecziun civila dal chantun Glaruna, tel. +41 55 646 68 55, e‑mail Thomas.Gabathuler@gl.ch

Responsabladad: Uffizi per la segirezza da victualias e per la sanadad d'animals