La Regenza ha approvà il project «Protecziun cunter bovas Sassalbo» da la vischnanca da Poschiavo e garantescha a tala ina contribuziun chantunala tenor la Lescha da guaud en l'autezza da 132 000 francs. Ultra da quai ha ella approvà – tenor la cunvegna da program da la Nova gulivaziun da finanzas (NGF) – ina contribuziun federala da 115 500 francs als custs totals dal project da 330 000 francs.

Fermas precipitaziuns procuran adina puspè per bovas al pè da la muntogna Sassalbo en la vischnanca da Poschiavo. L'ultima giada è quai stà il cas ils 13 da fanadur 2023 sco er ils 5 da zercladur 2018. Sediments d'ulteriuras bovas sin las terrassas situadas sutvart demussan che quest territori è fermamain en moviment. Tenor il giudicament dals privels datti perfin scenaris per eveniments rars. Quests scenaris prognostitgeschan bovas che pudessan cuntanscher ils aclauns Somaino, Pradasc e Raviscé e periclitar edifizis e persunas. La finamira dal project «Protecziun cunter bovas Sassalbo» è pia er quella da garantir la protecziun dal territori abità. Per franar las grondas quantitads da glera che pudessan crudar u glischnar vegn il terren splattà en tscherts lieus. Cun il material allontanà vegnan lura construids rempars da terra natirals. Plinavant vegn la vart dadens dals rempars rinforzada cun blocs da crappa. Cun realisar quest project pon ils privels existents vegnir reducids marcantamain. La segirezza dal territori abità vegn augmentada ed i vegnan protegidas persunas e valurs materialas considerablas cunter eveniments da la natira.

Fotografia ord l'aria suenter las bovas dals 13 da fanadur 2023