Il cussegl da fundaziun da la Fundaziun Stavros S. Niarchos ha examinà er quest onn las dumondas da contribuziun per projects dals secturs cultura, scienza e fatgs socials. Bundant 100 projects vegnan sustegnids cun ina contribuziun finanziala.

La fundaziun ch'è vegnida instituida l'onn 2000 ha l'intent da sustegnair finanzialmain projects culturals, scientifics e socials en il chantun Grischun sco er instituziuns e persunas grischunas che s'engaschan sin quests champs. Il cussegl da fundaziun sa cumpona da Philip S. Niarchos (president), Spyros N. Niarchos, Christoph Klemm, Claus Zellner, cusseglier guvernativ Martin Bühler e Barbara Gabrielli, manadra da l'Uffizi da cultura.

Er quest onn èn puspè vegnids inoltrads numerus projects interessants ed innovativs da tut las regiuns dal chantun Grischun. Grazia al grond engaschament da la famiglia Niarchos han 125 dals totalmain 216 projects inoltrads pudì vegnir sustegnids cun ina contribuziun finanziala.

La Fundaziun Stavros S. Niarchos ha ina valur ordvart gronda per il chantun Grischun. Cun ses agid pon numnadamain vegnir promovids projects multifars en l'entir chantun.

Infurmaziuns:

Andrea Conrad, manadra Promoziun da la cultura dal Grischun, tel. +41 81 257 48 07 (cuntanschibla da las 09.00 fin las 11.30), e‑mail Andrea.Conrad@afk.gr.ch