Tenor il conclus da la Regenza vegn mintgamai in terz dal retgav da la collecta da la Rogaziun federala 2024 attribuì a las suandantas organisaziuns che furneschan servetschs prezius a favur da la populaziun grischuna: a l'Associaziun Fontana Passugg (Post spezialisà per furmaziun bilinguala), a l'Uniun Inclusiun Sportiva ed a l'Uniun Tanzparty Cuira.

Il Di da la Rogaziun federala è ils 15 da settember 2024. Quel di vegn fatga en tut las baselgias dal chantun ina collecta per intents d'utilitad publica. L'utilisaziun da tala vegn determinada da la Regenza. En il quint 2023 ha la collecta importà 21 000 francs. Per l'onn 2024 vegni medemamain quintà cun ina collecta da 21 000 francs.

Il Post spezialisà per furmaziun bilinguala da l'Associaziun Fontana Passugg sustegna uffants cun impediments da l'udida e lur ambient social. Il post spezialisà promova l'acquisiziun da la lingua da segns e da la lingua discurrida a medem temp. L'Uniun Inclusiun Sportiva porscha activitads adattadas per persunas cun impediments. L'instituziun cun sedia en l'Engiadina è ina plattafurma per umans cun e senza impediments cun la finamira da porscher occupaziuns sportivas cuminaivlas. L'Uniun Tanzparty Cuira organisescha dapi onns mintgamai l'emprima sonda dal mais ina party da saut per persunas cun impediments. Ellas duain avair la pussaivladad da sa divertir, da rir e da sautar ensemen.