L'onn 2023 han 18 gimnasis gì per l'emprima giada la pussaivladad d'inoltrar a l'Academia svizra da las scienzas natiralas (SCNAT) ina candidatura per renovar il label d'ina scola activa en ils secturs MINT. Sco ina da las emprimas scolas cun quest label ha la Scola chantunala grischuna pudì persvader la giuria ina segunda giada cun sia purschida multifara en ils secturs MINT. En il rom da l'inscunter dals gimnasis activs en ils secturs MINT dals 15 da matg 2024 a Berna ha ella pudì prender encunter il label per ulteriurs 5 onns.

Il label Gimnasi activ en ils secturs MINT ha la finamira da promover en general ils secturs MINT en Svizra e da sustegnair la capacitad d'innovaziun gronda ed impurtanta da l'economia svizra, ch'il Cussegl federal ha prendì en mira. MINT stat per matematica, informatica, scienzas natiralas e tecnica. In'ulteriura finamira èsi da colliar ina cun l'autra las scolas che portan il label MINT e da promover lur collavuraziun. La Scola chantunala grischuna surpiglia vinavant sia responsabladad en quest sectur e metta a disposiziun ina vasta purschida da scolaziuns en ils secturs MINT per las scolaras ed ils scolars sco futuras forzas spezialisadas.

Purschida multifara a la Scola chantunala grischuna
La Scola chantunala grischuna ha survegnì il label per ils onns 2024 fin 2029 particularmain per sia purschida da promoziun generalmain vasta en ils secturs MINT, per l'instrucziun orientada a la pratica ed a l'applicaziun en ils roms correspundents sco er per ses engaschament spezial en ils roms geografia e geologia. Ultra da quai tgira la pli gronda scola media dal Grischun ina cultura da concurrenza prosperaivla. Ella sa legra regularmain da lavurs da maturitad premiadas d'instituziuns naziunalas sco «Scienza e giuventetgna» u da premis en concurrenzas chantunalas, sco per exempel da la Societad grischuna per la perscrutaziun da la natira. A chaschun d'emnas tematicas, da roms facultativs e da lavurs interdisciplinaras en ils secturs MINT survegnan las scolaras ed ils scolars la pussaivladad da s'approfundar en in tema, tut tenor l'interess. En la scola vegnan organisads regularmain occurrenzas, sco il favrer 2023 il TecDay, u referats da scienziadas e scienziads da la natira renumads, sco il november 2023 da l'anteriur directur da la NASA dr. Thomas Zurbuchen. Questas occurrenzas sensibiliseschan las scolaras ed ils scolars supplementarmain per dumondas actualas en ils secturs MINT.

Sco part da la rait dals actualmain 33 gimnasis activs en ils secturs MINT profitescha la Scola chantunala grischuna da diversas activitads da barat cun autras scolas medias e da programs tranter scolas en Svizra ed a l'exteriur.

Fotografia agiuntada:

Da sanestra: Caspar Bamert (magister da matematica ed informatica e commember da la gruppa da lavur MINT), Jean-Marc Chatelanat (president da la cumissiun da las giurias), Philippe Benguerel (rectur), dr. Urs Spirig (prorectur, manader da la promoziun MINT), Michael Graf (magister da geografia e commember da la gruppa da lavur MINT)

Infurmaziuns:

• Philippe Benguerel, rectur da la Scola chantunala grischuna, tel. +41 81 257 51 51 (cuntanschibel da las 11.00 fin las 12.00 e da las 14.00 fin las 15.00), e‑mail Philippe.Benguerel@bks.gr.ch
• Dr. Urs Spirig, prorectur da la Scola chantunala grischuna e manader da la promoziun MINT, tel. +41 81 251 51 51 (cuntanschibel da las 10.00 fin las 11.00), e‑mail Urs.Spirig@bks.gr.ch

Responsabladad: Uffizi per la furmaziun media-superiura