Il chantun Grischun ha preschentà per l'emprima giada ina Strategia turistica cumplessiva. En questa strategia formulescha la Regenza sias intenziuns e definescha champs d'acziun ch'èn orientads ad in svilup duraivel da l'economia turistica. A tut las persunas che lavuran en il turissem dal Grischun, dat la nova strategia impuls e las fa reflectar davart midadas.
Il turissem è ina pitga impurtanta da l'economia d'export dal Grischun ed è da gronda impurtanza per l'economia publica grischuna. Quai mussa tranter auter il studi da valurisaziun che l'Uffizi per economia e turissem (UET) ha incumbensà dacurt. La Strategia turistica qua avant maun mussa la tenuta da la Regenza e stgaffescha in rom d'orientaziun per tut las parts participadas.
Maletg dal futur vegn concretisà tras finamiras strategicas
Il turissem dal Grischun duai surpigliar er en il futur ina rolla directiva en il turissem alpin. Perquai formulescha la Regenza il suandant maletg dal futur:
Il turissem en il Grischun mantegna ed augmenta il bainstar e la qualitad da viver da las abitantas e dals abitants. El gida ad obtegnair spazis da viver attractivs per indigens e per giasts sco er a mantegnair abitadis decentrals, ed el vegn sustegnì da la populaziun indigena. Cun sia orientaziun ad in turissem durant l'entir onn sco er cun metter il focus sin giasts da dimora e sin in'auta qualitad da las purschidas ha el success sin il martgà. Acturs turistics engaschads transfurman ils potenzials turistics en retgavs, quai grazia ad ina buna collavuraziun ed a structuras effizientas. Il sistem turistic sa qualifitgescha tras in'auta cumpetenza sin il martgà e dat impuls per in svilup prosperaivel. Tut en tut procura il turissem per dapli renum per il chantun ed al gida ch'el, sco lieu turistic, è giavischà ed ha success.
Quest maletg dal futur vegn concretisà tras finamiras strategicas a vista mesauna:
Dar impuls
Cun la Strategia turistica vul la Regenza dar impuls, dentant senza dar directamain instrucziuns. «Nus stgaffin il rom e dain ils impuls per in agir economic e per l'innovaziun en il turissem. Per la realisaziun èn dumandadas atgna responsabladad da vart da l'economia privata e da vart dal maun public», di il cusseglier guvernativ Marcus Caduff, schef dal Departament d'economia publica e fatgs socials.
La Strategia turistica è vegnida elavurada en collavuraziun cun represchentantas e represchentants da l'economia turistica dal Grischun. Ella vala sco punct da partenza per propi per in ulteriur process; in process che transfurma ils tratgs fundamentals da la strategia en mesiras concretas, che lascha formular las prioritads futuras da la purschida tras il sistem turistic e che determinescha strategias da commerzialisaziun cuminaivlas. La Strategia turistica na descriva perquai betg mo ils temas da promoziun futurs, mabain duai en emprima lingia er stimular e dar impuls.
Basa per in success duraivel
Tut en tut ha il Grischun ina buna posiziun sin il martgà. Las midadas dal clima, il svilup demografic e social cun lur consequenzas sin il martgà da lavur, sco er la digitalisaziun pretendan dentant da renovar ils models usitads e da collavurar pli fitg en moda interdisciplinara. Ils purtaders da prestaziuns turisticas, las federaziuns, las vischnancas e l'administraziun chantunala èn envidads da vesair las schanzas e las sfidas, quai per che la branscha possia s'adattar a las midadas e possia sa sviluppar vinavant en direcziun d'in turissem durant l'entir onn ch'è persistent ed orientà a pernottaziuns.
Agiuntas:
Infurmaziuns:
Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel da las 14.00 fin las 15.00), e‑mail Marcus.Caduff@dvs.gr.ch
Responsabladad: Regenza