La Regenza grischuna ha nominà Martina Rehli sco nova secretaria generala dal Departament d'infrastructura, energia e mobilitad. Ella vegn a surpigliar questa funcziun il 1. da settember 2024.

La Regenza ha elegì Martina Rehli sco nova secretaria generala dal Departament d'infrastructura, energia e mobilitad (DIEM) da la cussegliera guvernativa dr. Carmelia Maissen. Martina Rehli ha 47 onns ed abita a Maiavilla. Ella è creschida si a Walenstadt (SG), ha studegià giurisprudenza a l'Universitad da Turitg, ha fatg in Master of Public Management a l'Universitad da Berna e dispona da dus Certificates of Advanced Studies (CAS) da l'Universitad da Son Gagl en «Furmaziun supplementara per la politica» sco er «Schliaziun da conflicts en interpresas ed en l'administraziun».

Martina Rehli ha lavurà ils ultims 16 onns sco secretaria dal Departament Construcziun ed ambient dal chantun Glaruna. En questa funcziun è ella stada responsabla principalmain per la direcziun dal Secretariat dal departament, per il sustegn da la direcziun e per la cussegliaziun dal schef dal departament sco er per la coordinaziun da fatschentas da la Regenza e dals differents uffizis.

Il DIEM cumpiglia ils suandants secturs: energia, forza idraulica, privels da la natira, traffic public, construcziun auta e bassa, acquisiziuns, guaud sco er chatscha, animals da rapina gronds e pestga. El è dividì en tschintg uffizis sco er en il Secretariat dal departament che porscha – sco organ da stab central – in vast sustegn a la scheffa dal departament tar la direcziun specifica e politica dal departament.

Fotografia agiuntada:

Infurmaziuns:

Cussegliera guvernativa dr. Carmelia Maissen, scheffa dal Departament d'infrastructura, energia e mobilitad, tel. +41 81 257 36 05 (cuntanschibla da las 10.00 fin las 10.30), e‑mail Carmelia.Maissen@diem.gr.ch