L'Uffizi per l'execuziun giudiziala sa prepara per ils onns vegnints. Suenter diversas novaziuns ed in grond augment da collavuraturas e collavuraturs e curt avant il pensiunament da persunas impurtantas, duain las structuras ed ils process da l'uffizi sco er las pussaivladads da cundecider da las collavuras e dals collavuraturs vegnir examinads ed adattads là, nua che quai è necessari. Ensemen cun il Departament da giustia, segirezza e sanadad prenda l'uffizi per mauns quest pass cun agid extern.

L'Uffizi per l'execuziun giudiziala (UEG) occupa var 200 collavuraturas e collavuraturs en il servetsch d'execuziun e d'assistenza da reabilitaziun, en l'execuziun averta dal Stabiliment giudizial Realta ed en l'execuziun serrada dal Stabiliment giudizial Cazas Tignez. Il Stabiliment giudizial Cazas Tignez ha pudì vegnir retratg avant 4 onns, curt avant la pandemia da corona, sco remplazzament per l'anteriura praschun Sennhof a Cuira. «En connex cun la midada en il pli modern stabiliment giudizial da la Svizra èn las stentas per recrutar, introducir e scolar novas collavuraturas e novs collavuraturs stadas fitg grondas», di il schef dal departament Peter Peyer.

Il dumber dal persunal per l'execuziun serrada è vegnì quadruplà. Actualmain assistan pli che 100 collavuraturas e collavuraturs a Cazas Tignez trais giadas uschè blers praschuniers sco durant il temp dal Sennhof. L'execuziun giudiziala moderna ed orientada a las ristgas pretenda, che las collavuraturas ed ils collavuraturs sajan flexibels e sa perfecziuneschian cuntinuadamain. «Il tractament exigent dals praschuniers è fitg pretensius ed engrevgiant en il mintgadi da lavur. Ultra da l'arrest effectiv èn ils praschuniers numnadamain er confruntads cun problems da dependenza, da la sanadad fisica e psichica sco er dal vegnir vegl. Nossas collavuraturas e noss collavuraturs prestan qua ina fitg buna lavur», constatescha il manader da l'uffizi Mathias Fässler.

L'execuziun giudiziala sa mida ed è suttamessa a grondas variaziuns
Plinavant varieschan las cifras d'occupaziun fermamain en ils stabiliments. Il mument èn ellas fitg autas. In motiv per quai è er, ch'ils ulteriurs chantuns da concordat, en spezial Turitg, surdattan anc adina bleras persunas al chantun Grischun per l'expiaziun da l'arrest. «La finala è quai in mussament da confidenza per l'auta qualitad da l'execuziun giudiziala en ils dus stabiliments giudizials», constatescha il manader da l'uffizi Mathias Fässler.

Blers projects en l'Uffizi per l'execuziun giudiziala
Malgrà las grondas sfidas durant la retratga ed il manaschi dal nov stabiliment giudizial ha l'Uffizi per l'execuziun giudiziala lantschà e realisà blers projects. Uschia per exempel la nova partiziun transitorica serrada, novs edifizis sin il bain puril, il label da products «inhaft geschaffen» sco er il remplazzament da divers sistems dad IT. En il rom dal plan d'acziun egual21 prepara il UEG actualmain en collavuraziun cun il Center UND in project da pilot davart il tema cumpatibilitad da la professiun cun la vita privata sco er davart l'egualitad. Quest project cumenza l'atun. Tut en tut elavuran ils dus stabiliments giudizials il mument pli che 50 temas e projects spezials.

Identifitgà sco champs d'acziun il svilup dal persunal e la pussaivladad da cooperar
L'evaluaziun da l'enquista da las collavuraturas e dals collavuraturs ch'il Departament da giustia, segirezza e sanadad (DGSS) ha fatg il cumenzament dal 2024 mussa, che er las collavuraturas ed ils collavuraturs da l'execuziun giudiziala giavischan d'avair dapli pussaivladads da cundecider sco er ulteriuras perspectivas professiunalas. Per pudair realisar quests giavischs en in setting sco l'execuziun giudiziala ch'è fitg structurada per motivs da segirezza, dovri tenor l'avis dal UEG e dal DGSS scleriments pli detagliads.

Ils proxims onns vegni plinavant a dar plirs pensiunaments sin il plaun directiv suprem. Per la direcziun da l'uffizi e dal departament èsi perquai ussa il dretg mument per laschar analisar las structuras ed ils process da l'organisaziun tras ina interpresa da cussegliaziun externa e da formular recumandaziuns sin basa da quests resultats. Uschia na duai betg mo vegnir garantì, che las plazzas decisivas vegnian occupadas a temp cun novas persunas; plitost duain vegnir tschertgadas pussaivladads d'utilisar ils potenzials da sinergias per distgargiar las collavuraturas ed ils collavuraturs sco er per augmentar lur cuntentientscha, e tut quai er en vista a la mancanza da persunas spezialisadas. «Suenter fasas da midada vulain nus ir cuminaivlamain e rinforzads èn l'avegnir», concluda il cusseglier guvernativ Peter Peyer.

Infurmaziuns:

• Cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01 (cuntanschibel da las 11.00 fin las 12.00), e‑mail Peter.Peyer@djsg.gr.ch
• Mathias Fässler, manader da l'Uffizi per l'execuziun giudiziala, tel. +41 81 257 52 51 (cuntanschibel da las 11.00 fin las 12.00), e‑mail Mathias.Fässler@ajv.gr.ch