Ils 13 da favrer 2024 ed ils 12 da mars 2024 han gì lieu ils examens d'admissiun chantunals per entrar en ina scola media grischuna. 517 scolaras e scolars han dumagnà l'admissiun en ina da las nov scolas medias grischunas cun las partiziuns gimnasi, scola media commerziala e scola media spezialisada.

Tut en tut han 837 scolaras e scolars frequentà ils examens d'admissiun chantunals en ina da las nov scolas medias grischunas. L'onn precedent eran quai 854 candidatas e candidats.

Examen d'admissiun per la 1. classa dal gimnasi da lunga durada
Da las 397 scolaras e scolars da la 6. classa primara ch'èn sa preschentads per l'examen d'admissiun han 235 (59 pertschient) dumagnà l'admissiun en la 1. classa dal gimnasi da 6 onns (l'uschenumnà gimnasi da lunga durada). Cumpareglià cun tut las 1760 scolaras e scolars da la 6. classa primara en il chantun importa la quota da giuvenils admess a la 1. classa dal gimnasi da lunga durada 13,4 pertschient. La quota d'admissiun da l'onn precedent era cun stgars 13 pertschient in zic pli bassa.

Examen unifitgà per la 3. classa gimnasiala sco er per la 1. classa da la scola media commerziala u spezialisada
Da las 440 scolaras e scolars che han fatg quest onn l'examen unifitgà per l'admissiun en la 3. classa gimnasiala u en la 1. classa da la scola media commerziala u da la scola media spezialisada, han 175 (39,8 pertschient) dumagnà l'admissiun en la 3. classa gimnasiala e 107 (24,3 pertschient) l'admissiun en la 1. classa da la scola media commerziala u da la scola media spezialisada. La quota d'admissiun per entrar en la 3. classa gimnasiala importa quest onn var 10,5 pertschient da l'annada da referenza ed è pia in zic pli bassa che l'onn precedent (10,8 pertschient).

Success tar ils examens finals a las scolas medias dal Grischun
Tut en tut han 557 scolaras e scolars absolvì ils examens finals en ina da las nov scolas medias dal Grischun ed a la Scola svizra da Milaun (402 maturitads gimnasialas, 69 diploms da scola media professiunala, 68 maturitads spezialisadas e 18 diploms da scola media commerziala). 552 scolaras e scolars han gì success ed han pudì prender encunter las ultimas emnas lur attestat final.

Infurmaziuns:

Regina Just Brodbeck, manadra da la partiziun Scolas medias, Uffizi per la furmaziun media-superiura, tel. +41 81 257 61 69 (cuntanschibla da las 09.00 fin las 11.30), e‑mail Regina.Just@ahb.gr.ch