Duas emnas suenter las malauras desastrusas en il Mesauc vegn la via naziunala A13 puspè dada liber per il traffic mintgamai sin in vial, e quai a partir da damaun venderdi, ils 5 da fanadur 2024, a las 05.00. La via chantunala H13 sco er la via dal pass dal San Bernardin èn medemamain avertas fin Lostallo per il traffic nord-sid. Vinavant serrada per il traffic da transit resta la via tranter Lostallo e Grono.

Il post d'infurmaziun e da triascha a Valragn è vegnì abolì. A partir da damaun venderdi, ils 5 da fanadur, a las 05.00, vegn il traffic da transit infurmà e triaschà a Lostallo.

Tranter Lostallo e Grono resta la via chantunala per entant serrada per il traffic da transit. Tar il post d'infurmaziun e da triascha a Lostallo vegn il traffic manà sin la via naziunala A13.

Per che las lavurs da rumida e da reparaziun na vegnian betg impedidas e possian avanzar svelt, èsi impurtant da tegnair davent uschè bler traffic sco pussaivel dal territori pertutgà. Particularmain en la regiun da Sorte vegnan questas lavurs a durar anc pliras emnas. La via chantunala stat perquai a disposiziun mo al traffic local ed al traffic betg motorisà. Viagiaturas e viagiaturs cun ina destinaziun tranter Lostallo e Grono – ed en spezial il traffic turistic cun la cumprova d'ina reservaziun – dastgan passar.

Infurmaziuns actualas davart il stadi da las vias: strassen.gr.ch

Fotografia agiuntada:

La via chantunala a Sorte è vinavant intransibla.

Infurmaziuns:

Andreas Pöhl,manader Gestiun dal traffic, Uffizi da construcziun bassa dal Grischun, e‑mail medien@tba.gr.ch

Responsabladad: Uffizi da construcziun bassa