En il Stadi liber da las Trais Lias na devi betg mo umans ed animals. Figuras fabulusas sco draguns faschevan part da la cardientscha e dal mintgadi dals umans. En il gieu auditiv «L'ultim dragun» cumpara l'ultima perditga dal temp dal Stadi liber da las Trais Lias e respunda en moda nunusitada dumondas davart l'istorgia dal Grischun. La rolla dal dragun vegn discurrida l'actura grischuna Ursina Lardi, e quai en tut las trais linguas chantunalas. Il gieu auditiv è libramain disponibel.

Dapi il temp medieval han ins malegià figuras fabulusas, per exempel vi dals mirs da las chasas e da las baselgias. Vegnidas descrittas èn ellas plinavant da cronists da renum, sco Durich Chiampell (1510-1582) ch'è enconuschent sco «bab da l'istoriografia grischuna». Ussa relata in tal dragun da sias aventuras cun ils umans, en spezial durant il temp dal Stadi liber da las Trais Lias. En il cudesch auditiv «L'ultim dragun» raquinta il dragun dal Schwarzhorn da ses sgols sur las muntognas ed ils vitgs dal Grischun, da sia predilecziun per nursas e chauras e da sia bandischun en in cuvel. Il gieu auditiv è in invit da scuvrir l'istorgia fascinanta dal Grischun en moda e maniera multifara e mintgatant nunusitada.

Il Grischun ord la perspectiva d'in dragun
Il dragun che cumpara en il gieu auditiv n'è betg ina invenziun. Il gieu auditiv sa basa sin ina ditga da la Val Sertig sur Tavau. Quella è vegnida documentada tranter auter dal rimnader da ditgas Arnold Büchli (1885-1970). L'autur grischun Thomas Kaiser ha extendì la ditga e lascha discurrer il dragun grischun.

Il gieu auditiv en otg episodas è vegnì registrà dal producent da musica da Lou Zarra da Cuira. El ha cumplettà miaivlamain il gieu auditiv cun tuns musicals. La rolla dal dragun dal Schwarzhorn vegn discurrida dad Ursina Lardi – per rumantsch, tudestg e talian. La Grischuna viva oz a Berlin e lavura per il teater, il film e la televisiun. L'onn 2017 ha Ursina Lardi survegnì l'Anè Hans Reinhart, che vala sco pli aut premi da teater da la Svizra. L'onn 2024 è ella vegnida onurada cun il premi da cultura da la citad da Cuira.

Libramain disponibel sin 500.gr.ch
Il gieu auditiv è disponibel sin https://500.gr.ch/rum/gieu-auditiv e dastga vegnir duvrà libramain per activitads en scolas, per occurrenzas e per ulteriuras occasiuns.

Ulteriuras activitads da giubileum
Las numerusas activitads en tut las regiuns linguisticas pon vegnir consultadas da tut temp sut https://500.gr.ch/rum/.

Fotografias agiuntadas:

  

Ursina Lardi durant las registraziuns en il studio

Maletg da la campagna «L'ultim dragun»

Infurmaziuns:

• Daniel Camenisch, manader dal project «500 onns Stadi liber da las Trais Lias», tel. +41 78 659 63 60, e‑mail camenisch@vinavant.ch

• Thomas Kaiser, autur dal gieu auditiv «L'ultim dragun», tel. +41 79 656 79 09, e‑mail info@wortwert.ch

Responsabladad: Departament d'educaziun, cultura e protecziun da l'ambient