Questa stad pon 29 fugitivas e fugitivs, ch'èn vegnids accumpagnads dal Post spezialisà per l'integraziun, far festa: ellas ed els han terminà cun success lur emprendissadi en il chantun Grischun. Per las absolventas ed ils absolvents è quest success in pass impurtant sin lur via en il martgà da lavur svizzer.

Cun l'accumpagnament dal Post spezialisà per l'integraziun han tut en tut 20 umens e 9 dunnas terminà lur furmaziun professiunala da basa en ils champs professiunals artisanadi, tecnica d'edifizis, gastronomia e tgira. «Las prestaziuns da las persunas giuvnas creschidas èn impressiunantas», di Felix Birchler, manader dal Post spezialisà per l'integraziun dal Grischun. A medem temp lauda el lur engaschament e lur perseveranza. In terz da las absolventas e dals absolvents deriva da l'Afganistan, in terz da l'Eritrea ed in terz da divers pajais.

«La via al diplom professiunal è stada ina sfida speziala per bleras da questas persunas giuvnas. Ellas n'han betg mo ademplì las pretensiuns specificas da lur professiuns, mabain han er acquistà las enconuschientschas linguisticas necessarias ed èn sa vividas en en la cultura da lavur da la Svizra. Quai mussa, quant impurtantas che la furmaziun e la lavur èn per ina integraziun da success», di Birchler.

Sustegn da las interpresas e da la societad
Senza in sustegn extraordinari dals manaschis da scolaziun na fissi betg pussaivel da terminar ils emprendissadis cun success. Var 25 manaschis ed interpresas han accumpagnà las emprendistas ed ils emprendists ils ultims onns tras lur temp da scolaziun. Sustegn han ellas ed els survegnì dal Post spezialisà per l'integraziun, che accumpogna l'integraziun professiunala da fugitivas e fugitivs sur il job coaching. Uschia han ils manaschis d'emprendissadi gì in post da contact durant l'entir temp d'emprendissadi.

Suenter avair terminà lur emprendissadi cun success, han las absolventas ed ils absolvents numerusas pussaivladads professiunalas. La gronda part dad ellas e dad els ha gia chattà ina plazza stabla u cuntinuescha gist la scolaziun cun in ulteriur emprendissadi.

Infurmaziuns:

Felix Birchler, manader dal Post spezialisà per l'integraziun / incumbensà chantunal d'integraziun, Uffizi da migraziun e da dretg civil, tel. +41 81 257 36 84 (cuntanschibel da las 09.00 fin las 15.00), e‑mail Felix.Birchler@afm.gr.ch