La Regenza ha deliberà la missiva tar il Concept per promover la cultura en il Grischun per mauns dal Cussegl grond. Quest segund Concept per promover la cultura fixescha las finamiras ed ils accents da la politica culturala dal Grischun per ils onns 2025 fin 2028 e formulescha las mesiras per cuntanscher las finamiras. Il Cussegl grond vegn a tractar questa fatschenta durant la sessiun d'october 2024.
La Lescha davart la promoziun da la cultura e l'Ordinaziun davart la promoziun da la cultura formuleschan l'intent e las finamiras da la politica culturala chantunala. D'ina vart fixeschan ellas las incumbensas statalas per promover, per tgirar e per intermediar la cultura, da l'autra vart las cundiziuns generalas, entaifer las qualas la lavur culturala multifara, la participaziun d'ina gronda part da la populaziun a la vita culturala sco er la tgira e l'intermediaziun dal patrimoni cultural pon sa sviluppar. En la Lescha davart la promoziun da la cultura vegn menziunà explicitamain er in concept cumplessiv per promover la cultura en il Grischun, ch'il Cussegl grond deliberescha mintga 4 onns sin proposta da la Regenza. Il segund Concept per promover la cultura per ils onns 2025–2028 stat ussa a disposiziun.
Svilup da concepts
La Constituziun dal chantun Grischun, la Lescha davart la promoziun da la cultura sco er l'Ordinaziun davart la promoziun da la cultura fixeschan la libertad d'agir tematica per il concept per promover la cultura. Il concept sa basa sin la situaziun da la cuntrada culturala en il chantun Grischun e sin las experientschas fatgas en il sectur da la promoziun da la cultura dapi l'entrada en vigur da l'emprima Lescha davart la promoziun da la cultura. Ultra da quai resguarda el svilups socials, demografics, economics e tecnologics. El è vegnì elavurà da l'Uffizi da cultura en il decurs da la primavaira 2023 fin il cumenzament da la stad 2024, quai en collavuraziun cun las organisaziuns culturalas dal Grischun e cun la Cumissiun da cultura.
En in emprim pass è vegnì evaluà il Concept per promover la cultura 2021–2024. Il questiunari è vegnì tramess a las instituziuns cun ina cunvegna da prestaziun sin basa da l'emprim concept sco er a las instituziuns ed a las organisaziuns che survegnan ina contribuziun a projects da plirs onns. Plinavant èn represchentantas e represchentants d'organisaziuns culturalas e d'organisaziuns liadas a la cultura vegnids envidads a l'emprim «inscunter grischun da cultura», ina plattafurma d'infurmaziun e da barat. Al «inscunter grischun da cultura» ed en las gruppas da lavur respectivas han las participantas ed ils participants pudì sa participar activamain a l'elavuraziun dal Concept per promover la cultura 2025–2028.
Accents da promoziun
Il Concept per promover la cultura en il Grischun preschenta la situaziun actuala en ils differents secturs da la promoziun chantunala da la cultura. El definescha accents concrets per ils trais champs d'acziun promoziun da la cultura, tgira da la cultura sco er intermediaziun da la cultura per ils proxims 4 onns e mussa mesiras concretas per cuntanscher questas finamiras. Tut quai adina resguardond la collavuraziun tranter il chantun, las regiuns, las vischnancas e las persunas privatas sco er ils secturs da promoziun tenor la Lescha davart la promoziun da la cultura.
L'evaluaziun ed il process participativ han mussà ch'ils accents da promoziun da l'emprim Concept per promover la cultura èn sa cumprovads e duain essenzialmain vegnir mantegnids. Els survegnan mo intginas cumplettaziuns e precisaziuns.
Il text da la missiva, las agiuntas e la pagina d'internet da la Promoziun da la cultura dal Grischun cuntegnan ina resumaziun da la documentaziun elavurada.
Agiunta:
Missiva
Infurmaziuns:
President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 11.00 fin las 11.45), e‑mail Jondomenic.Parolini@ekud.gr.ch
responsabel: Regenza