La Regenza ha approvà trais projects d'ovras da protecziun cunter lavinas e crudadas da crappa sin vias chantunalas sco er sin ina lingia da la Viafier retica.
Augmentar la segirezza cunter lavinas sin la via d'Engiadina
La Regenza ha approvà il project «Siglientada
da lavinas Val Funtana, H27 Via d'Engiadina» da l'Uffizi da construcziun bassa.
Plinavant ha ella permess contribuziuns als custs totals da var 990 000 francs. Ella ha concedì tut en tut maximalmain 396 000 francs tenor la
Lescha chantunala davart il guaud e maximalmain 346 000 francs tenor la
cunvegna da program da la NGF cun la Confederaziun en il sectur «Ovras da
protecziun e basas davart ils privels».
Quest
project ha l'intent d'augmentar la segirezza per las utilisadras ed ils
utilisaders da la Via d'Engiadina tranter Martina ed il cunfin naziunal cun
l'Austria. Durant ils mais d'enviern è questa via serrada regularmain pervia
dal privel da lavinas. Il project da construcziun cuntegna la realisaziun
d'indrizs fixs per siglientar lavinas. Igl è previs da construir quatter novas
pitgas per siglientar lavinas. Cun questa mesira na vegn betg mo reducida la
ristga restanta da lavinas per la via chantunala, mabain er il potenzial da
donns secundars per edifizis e per il guaud da protecziun tar Vinadi.
![Val Funtana](/DE/Medien/Mitteilungen/MMStaka/2024/PublishingImages/Foto%20KLA%20Val%20Funtana,%20H27%20Engadinerstrasse__w_1200__h_0.jpg)
La Regenza ha approvà il project «Siglientada da lavinas Val Funtana, H27 Via d'Engiadina» da l'Uffizi da construcziun bassa. Plinavant ha ella permess contribuziuns als custs totals da var 990 000 francs.
Projects da protecziun cunter crudadas da crappa per proteger ils participants dal traffic en l'Engiadin'Ota
La Regenza ha approvà il project da protecziun
cunter crudadas da crappa «SSV Blais Parè» da l'Uffizi da construcziun bassa
sco er contribuziuns als custs tenor la Lescha chantunala davart il guaud e
tenor la cunvegna da program da la NGF cun la Confederaziun en il sectur «Ovras
da protecziun e basas davart ils privels». Als custs totals dad 1,27 milliuns francs per il project sur Segl Baselgia ha ella concedì ina contribuziun
chantunala da maximalmain 508 000 francs e disponì ina contribuziun
federala da maximalmain 444 500 francs.
Il
project «SSV Blais Parè» è vegnì elavurà pervia d'ina crudada da grippa tranter
Segl e Malögia il matg 2023. L'Uffizi da construcziun bassa ha laschà far sin
quai in emprim giudicament geologic ed ha prendì differentas mesiras d'urgenza
per proteger las participantas ed ils participants dal traffic. Il project ch'è
ussa avant maun prevesa d'augmentar il rempar da terra existent per proteger il
traject da via en il sectur tranter l'access da Segl Baselgia ed in parcadi sin
terren betg francà. En il rom dal project duai il rempar da terra ultra da quai
vegnir prolungà en direcziun da Silvaplauna (ca. 100 m) sco er en
direcziun da Malögia (ca. 120 m). Uschia resulta in rempar da
protecziun cunter crudadas da crappa omogen e nuninterrut da circa
255 meters.
![Blais Parè](/DE/Medien/Mitteilungen/MMStaka/2024/PublishingImages/Foto%20SSV%20Blais%20Parè__w_1200__h_0.jpg)
La Regenza ha approvà il project da protecziun cunter crudadas da crappa «SSV Blais Parè» da l'Uffizi da construcziun bassa sco er contribuziuns als custs tenor la Lescha chantunala davart il guaud e tenor la cunvegna da program da la NGF cun la Confederaziun en il sectur «Ovras da protecziun e basas davart ils privels».
Glisch verda per la renovaziun da las ovras da protecziun sur la lingia da viafier Tavau Laret – Tavau Wolfgang
La Regenza ha approvà il project «LV SSV Laret
e Schwarzsee» da la Viafier retica SA. Ils custs dal project èn calculads cun
975 000 francs. La Confederaziun ed il chantun sa participeschan a quels
cun ina contribuziun federala da maximalmain 341 250 francs tenor la
cunvegna da program da la NGF en il sectur «Ovras da protecziun e basas davart
ils privels» e cun ina contribuziun chantunala da maximalmain 390 000 francs
tenor la Lescha chantunala davart il guaud. Tut en tut èn quai pia maximalmain
731 250 francs. Il project vegn realisà en dus onns da construcziun e duai
vegnir terminà l'onn 2025.
Il
traject tranter Tavau Laret e Tavau Wolfgang sin la lingia da la Viafier retica
Landquart – Tavau è periclità tant da crudada da crappa e da blocca or da la
grippa ed or da las zonas d'erosiun survart, sco er da lavinas da naiv che
glischna sur las scarpas stippas giu. En ils dus territoris da rempars
existents «LV/SSV Laret staziun» e «LV/SSV Schwarzsee» (LV; Lawinenverbauung,
SSV; Steinschlagverbauung) protegian rempars da lavinas, palissadas da lain e
d'atschal sco er sutmiradas la lingia da viafier. Ils stabiliments èn dentant
donnegiads per part, uschia che lur effect da protecziun è restrenschì
fermamain. Perquai duain els vegnir remplazzads tras ovras da protecziun
adattadas che correspundan al stadi da la tecnica.
![LV SSV Laret](/DE/Medien/Mitteilungen/MMStaka/2024/PublishingImages/Foto%20LV%20SSV%20Schwarzsee%20Laret__w_1200__h_0.jpg)
© Caprez Ingenieure AG, Davos
La Regenza ha approvà il project «LV SSV Laret e Schwarzsee» da la Viafier retica SA.