En il rom d'ina festa renda la Regenza mintga onn onur a collavuraturas e collavuraturs che lavuran dapi blers onns en l'administraziun chantunala. Quest onn ha il president da la Regenza Jon Domenic Parolini pudì engraziar cun in pitschen regal da renconuschientscha a tut en tut 125 collavuraturas e collavuraturs per la lavur ch'ellas ed els han prestà durant blers onns.

Mintga onn undrescha la Regenza las collavuraturas ed ils collavuraturs che contribueschan dapi 20, 30 u schizunt 40 onns cun lur lavur en l'administraziun chantunala al bainstar da la populaziun grischuna. Sco engraziament per lur collavuraziun fidaivla survegnan ellas ed els dal president da la Regenza mintgamai in regal en furma d'in bon.

Quest onn han 9 collavuraturas e collavuraturs festivà lur giubileum da 40 onns, 52 collavuraturas e collavuraturs lur giubileum da 30 onns e 64 collavuraturas e collavuraturs lur giubileum da 20 onns. Sin il martgà da lavur che daventa pli e pli pretensius, èsi ord vista da la Regenza grischuna fitg legraivel da pudair sa fidar da collavuraturas e collavuraturs da blers onns ch'èn motivads e che han gronda experientscha.

Fotografia agiuntada:

Infurmaziuns:

President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01 (cuntanschibel da las 11.00 fin las 12.00), e‑mail Jondomenic.Parolini@ekud.gr.ch