Sco contribuziun al giubileum «500 onns Republica da las Trais Lias» è cumparida ina collecziun da recepts sco percurs culinaric tras 500 onns Grischun. L'uniun graubündenVIVA ha rimnà ils recepts ed edì quels sco pitschen cudesch – ensemen cun numerusas anecdotas istoricas. La collecziun è disponibla gratuitamain ed envida a cuschinar sez.
En l'istorgia dal Grischun na dastga la culinarica betg mancar. Il mangiar caracterisescha la cultura. Perquai è graubündenVIVA ida a la tschertga da recepts dals ultims 500 onns.
La collecziun da recepts ch'è resultada qua tras, unescha tratgas ch'èn stadas influenzadas da las regiuns vischinas e da l'istorgia variabla dal chantun. Da tratgas simplas e savurusas fin a creaziuns raffinadas per la societad nobla, raquinta mintga recept sia atgna istorgia. La collecziun da recepts envida ad in viadi culinaric tras la varietad da la cuschina grischuna.
Ils recepts èn vegnids retschertgads oravant tut en l'Archiv chantunal dal Grischun. La collecziun da recepts preschenta diesch recepts da differentas regiuns e da differents decennis. Els èn vegnids ordinads istoricamain e preparads per cuschinar sez. Uschia pon ins per exempel cuschinar sez fugaschas (1726–1775), la turta da guerra (1926–1975) u schizunt in ragout marinà da nozzas da 1575–1625. Pli vegl ch'il recept è, e pli pretensiusa che la preparaziun è stada. Tscherts recepts che na pon betg pli vegnir cuschinads en il temp dad oz, han chattà lur plazza en il chapitel «Curiusitads».
La collecziun da recepts po vegnir empustada gratuitamain sut www.graubuendenviva.ch/500Jahre. Ella stat medemamain a disposiziun sco download.
Ulteriuras activitads da giubileum ed ulteriurs projects
Las numerusas activitads en tut las regiuns linguisticas pon vegnir consultadas da tut temp sut https://500.gr.ch/rum/.
Fotografia agiuntada:
© Vinavant
Agiunta:
Collecziun da recepts
Infurmaziuns:
Dumondas en connex cun las festivitads da 500 onns:
- President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, e‑mail Jondomenic.Parolini@ekud.gr.ch
- Daniel Camenisch, manader dal project «500 onns Stadi liber da las Trais Lias», tel. +41 78 659 63 60 (cuntanschibel da las 10.00 fin las 12.00), e‑mail camenisch@vinavant.ch
Dumondas davart la collecziun da recepts:
Responsabladad: Departament d'educaziun, cultura e protecziun da l'ambient