La chapitala da la Lia da la Chadé celebrescha ils 7 da settember 2024 ses Bundstag. Il program multifar porscha attracziuns en l'entira citad veglia sco er ina inscenaziun da la radunanza da la citad anno 1524 en la baselgia da son Martin.
En la Republica da las Trais Lias era Cuira, ultra da Glion e da Tavau, in dals trais lieus, en ils quals las parsuras ed ils deputads sa reunivan al Bundstag. Al Bundstag a Cuira dals 7 da settember 2024 ans fan numerusas visitas guidadas ed inspecziuns enconuschent quel temp ed ans laschan chapir meglier il preschent. La Chasa municipala cun la stiva da cussegl e cun la sala dal Cussegl communal po vegnir visitada durant l'entir di en il rom da visitas guidadas captivantas. Il medem vala per il Museum retic ed il Museum dal stgazi da la catedrala sco er l'antistitium. Er la baselgia da son Martin sco perditga dal temp è averta durant l'entir di, inclusiv visitas guidadas cun in panorama unic giu dal clutger da son Martin.
La radunanza da citad – inscenaziun musicala, baselgia da son Martin
A la radunanza da citad anno 1524 en la baselgia da son Martin vegni discutà animadamain davart la Brev da federaziun planisada. Tut è cumpiglià da l'idea fundamentala, che mintga persuna, sche pur u nobel, è equivalenta ed ha ils medems dretgs e la brev s'oppona uschia er cunter la baselgia ch'è structurada en moda ierarchica. Ils burgais da Cuira prendan vehementamain il pled. Ina inscenaziun tuttafatg speziala che dat vita a l'istorgia da Cuira. A l'inscenaziun participeschan: il cusseglier guvernativ Martin Bühler ed il president da la citad Urs Marti (preschentaziun a las 11) sco er René Schnoz, Andrea Zogg e Rolf Schmid (tut las preschentaziuns).
Program cultural en in ambient medieval, sin la plazza Arcas ed en la citad veglia
Per far festa envidan concerts da tut gener, preschentaziuns da saut, cumbats da spada, ina ritga purschida d'alimentaziun, musica ambulanta e cumediants. Ultra dal martgà emnil da Cuira datti il martgà d'artisanadi en la Poststrasse ed il «Gänggali-Markt» (martgà da pileschs) sin il Martinsplatz. L'entira citad veglia da Cuira sa preschenta en in vestgì istoric e promova – ultra da la conscienza per l'istorgia – er il star da cumpagnia. En la halla da la chasa municipala porscha il Bundstag per ils uffants chaussas captivantas, a las qualas els pon far part.
Il program detaglià davart il Bundstag a Cuira chattais Vus en l'agiunta e sin www.chur.ch/bundstag.
I vegn cusseglià da viagiar cun il traffic public. Grazia a la purschida «simpel per retour» pajais Vus ils Bundstags mo il viadi per ir a Cuira. Il viadi da return è gratuit fin a Voss lieu da partenza en il Grischun.
Ulteriurs Bundstags e bleras activitads da giubileum
Ils Bundstags han lieu il 1. da settember 2024 a Samedan, ils 7 da settember 2024 a Cuira, ils 14 da settember 2024 a Poschiavo ed ils 6 d'october 2024 en la Val Müstair.
Las numerusas activitads en tut las regiuns linguisticas pon vegnir consultadas da tut temp actualisadas sut https://500.gr.ch/rum/.
Agiuntas:
Purschidas en survista (plan da la citad)
Maletg da la campagna Bundstag Cuira (mad da la citad da Cuira)
Infurmaziuns:
Dumondas en connex cun las festivitads da 500 onns:
- President da la Regenza dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch
- Daniel Camenisch, manader dal project «500 onns Stadi liber da las Trais Lias», tel. +41 78 659 63 60, e‑mail camenisch@vinavant.ch
Dumondas en connex cun il Bundstag Cuira:
Responsabladad: Departament d'educaziun, cultura e protecziun da l'ambient