Ils 21 da zercladur 2024 han malauras desastrusas en la regiun Mesauc tutgà las vischnancas da Cama, Grono, Lostallo, Mesocco, Soazza e Roveredo. La vischnanca da Lostallo è stada pertutgada spezialmain ferm da las malauras. Ina lavina da glera e da crappuns ha sutterrà parts da l'aclaun Sorte. Las malauras n'han betg mo chaschunà suffrientschas umanas, mabain er ruinà terren cultivabel e donnegià respectivamain destruì stabiliments d'infrastructura. La riva da la Moesa ed ina part da l'autostrada A13 èn vegnidas lavadas davent. L'axa nord-sid è sin quai stada serrada durant 2 emnas. Quant grond ch'il donn finanzial total da questa catastrofa da la natira vegn ad esser, na pon ins betg anc stimar per il mument. La solidaritad naziunala cun la populaziun da la Val Mesauc è fitg gronda. Differentas instituziuns publicas, interpresas e bleras persunas privatas han empermess u gia fatg donaziuns.

L'utilisaziun correcta dals daners da donaziuns vegn garantida tras ina cumissiun da donaziuns. La cumissiun è vegnida instituida da las vischnancas da la regiun Mesauc, ch'èn stadas pertutgadas da las malauras. La Regenza ha prendì enconuschientscha dal fatg, che la cussegliera naziunala Anna Giacometti sco presidenta ed il cusseglier dals chantuns Stefan Engler sco vicepresident èn sa declerads pronts da manar la cumissiun da donaziuns. L'Uffizi da vischnancas (UV) surpiglia la funcziun da surveglianza. Perquai vegn el er ad esser represchentà – en funcziun consultativa – en la cumissiun da donaziuns. La Regenza engrazia gia oz a tut las commembras ed ils commembers da la cumissiun da donaziuns per quest engaschament impurtant. Tut las infurmaziuns davart il conto da donaziuns stattan a disposiziun sin la pagina d'internet da la regiun Mesauc.

A la plaiv catolica da Lantsch ha la Regenza concedì ina contribuziun chantunala ed ina contribuziun federala supplementara da mintgamai 65 460 francs (tut en tut maximalmain 130 920 francs) per restaurar e per renovar la chasa-pravenda. Ils custs totals dal project èn budgetads cun var 1,85 milliuns francs, da quels èn totalmain 436 400 francs imputabels per la garanzia da contribuziun. En il rom da la concessiun da las contribuziuns da la tgira da monuments vegnan la chasa-pravenda e ses conturns mess sut la protecziun da monuments.

La chasa-pravenda sa chatta en la proxima vischinanza da la baselgia parochiala da Sontg Antoni a Lantsch ed è per gronda part anc sa mantegnida en sia substanza dal 17. tschientaner tardiv. Malgrà las renovaziuns pli novas, èn sa mantegnidas la repartiziun oriunda dals locals a l'intern e tschertas parts da l'equipament dal temp da construcziun da l'onn 1678. La proprietaria planisescha da renovar l'edifizi e da mantegnair per gronda part la substanza istorica.