La pagina d'internet strassen.gr.ch sa preschenta a partir dad oz en in nov vestgì: Cun in grond dumber da meglieraziuns e da novas funcziuns porscha l'Uffizi da construcziun bassa uss infurmaziuns anc pli precisas e pli vastas davart il stadi actual da las vias a las utilisadras ed als utilisaders.

Cun passa in milliun consultaziuns per onn è strassen.gr.ch ina da las paginas d'internet las pli frequentadas da l'administraziun chantunala. Ella porscha infurmaziuns preziusas davart il stadi actual da las vias sco er indicaziuns davart impediments u bloccadas. Cun il relaunch survegn la pagina in design adattà per apparats mobils, uschia ch'ins po utilisar la pagina en moda confortabla sin mintga apparat. Ultra da quai è strassen.gr.ch disponibel per tudestg e talian ed a partir d'immediat er per rumantsch.

Infurmaziuns pli precisas e pli detagliadas
Collavuraturas e collavuraturs da l'Uffizi da construcziun bassa (UCB) registreschan il stadi da las vias directamain al lieu e creeschan in'annunzia en cas da basegn. Il UCB ha optimà la structuraziun dals trajects da vias sin strassen.gr.ch, uschia che las annunzias pon ussa vegnir preschentadas en moda pli precisa. Preschentaziuns extendidas en colur faciliteschan ultra da quai la survista da la situaziun actuala.
In'ulteriura novaziun è, che la pagina d'internet serva er a la communicaziun d'eveniments: En cas da basegn po vegnir infurmà pli detagliadamain davart eveniments spezials.

Pussaivladads d'infurmar gratuitas pli vastas
A partir d'immediat pon las utilisadras ed ils utilisaders abunar las annunzias da set regiuns empè da quatter sco fin ussa. Plinavant èn pussaivlas communicaziuns separadas per il transport d'autos dal Vereina sco er per las vias naziunalas che mainan tras il chantun (N13 Bogn Ragaz – Roveredo, N28 Landquart – Claustra Selfranga sco er N29 Tusaun – Silvaplauna).
Ils chanals d'infurmaziun vertents per e-mail e per SMS restan. Il servetsch dad SMS è gratuit. Sco terza pussaivladad vegn purschì l'avertiment cun webpush.

Impurtant: Abunaments existents ston vegnir renovads
Tut ils abunaments existents èn vegnids deactivads en il rom dal relaunch. Per survegnir vinavant infurmaziuns actualas èsi necessari da selecziunar da nov las annunzias giavischadas. Quai è pussaivel en paucs pass e senza in conto d'utilisaziun directamain sin la pagina d'internet.

Ulteriuras infurmaziuns supplementaras interessantas sin strassen.gr.ch
Sper la survista davart il stadi actual da las vias porscha strassen.gr.ch ulteriuras infurmaziuns supplementaras: Detagls davart ils plazzals en il chantun sco charta interactiva u sco glista PDF, infurmaziuns davart restricziuns da l'utilisaziun da las vias, sco per exempel pais maximals e diversas statisticas davart l'avertura dals pass e davart las frequenzas dal traffic en il chantun èn accessibels sur la plattafurma.

Fotografia agiuntada:

Las collavuraturas ed ils collavuraturs da l'Uffizi da construcziun bassa registreschan il stadi da las vias directamain al lieu.

Infurmaziuns:

Reto Knuchel, inschigner chantunal, Uffizi da construcziun bassa, e‑mail medien@tba.gr.ch