La Regenza propona da reveder duas leschas per realisar la taglia minimala da la OECD en il chantun Grischun. Cun adattar la Lescha da taglia chantunala duain las vischnancas grischunas vegnir participadas commensuradamain a las eventualas entradas supplementaras. La Lescha davart il svilup economic duai vegnir cumplettada cun in nov instrument da promoziun, numnadamain cun ils credits da taglia. Cun agid da quels duai vegnir rinforzada l'attractivitad da l'economia locala e la cumpetitivitad dal chantun Grischun. La Regenza ha deliberà la missiva correspundenta per mauns dal Cussegl grond per la tractar en la sessiun da december 2024.
Il pievel ed ils chantuns han acceptà ils 18 da zercladur 2023 ina midada da la Constituziun federala per introducir la taglia minimala da la OECD en Svizra. Uschia vegn garantida l'imposiziun minimala da taglia da 15 pertschient per gruppas d'interpresas ch'èn activas sin plaun internaziunal cun ina svieuta da passa 750 milliuns euros en furma d'ina taglia cumplementara da la Confederaziun.
Revisiun parziala da la Lescha da taglia per il chantun Grischun (LT)
Las entradas or da la taglia cumplementara van per 25 pertschient a favur da la Confederaziun e per 75 pertschient a favur dals chantuns, en ils quals las interpresas pertutgadas èn suttamessas a la taglia. Questas entradas supplementaras varieschan fitg da chantun a chantun. Per il chantun Grischun n'èn ellas actualmain betg quantifitgablas en moda fidada, dastgassan dentant sa mover en il sectur bass da set cifras.
Tenor la Constituziun federala ston ils chantuns participar las vischnancas commensuradamain a las entradas supplementaras. La Regenza propona da divider las entradas en proporziun da 75 pertschient a favur dal chantun e da 25 pertschient a favur da las vischnancas. Las vischnancas duain pudair duvrar lur part senza intent fix. La repartiziun da las entradas supplementaras da la taglia minimala da la OECD sin las singulas vischnancas duai vegnir fatga en relaziun cun las taglias communalas sin il gudogn da las persunas giuridicas. La part chantunala vuless la Regenza percunter impunder en emprima lingia per mesiras da la plazza economica, quai che serva er a las vischnancas.
Revisiun parziala da la Lescha chantunala davart il svilup economic (LSE)
La restricziun da la concurrenza fiscala internaziunala per las grondas gruppas d'interpresas tras la taglia minimala da la OECD ha per consequenza, ch'i vegnan applitgads auters instruments da promoziun (betg fiscals) en la politica internaziunala ed interchantunala da la plazza economica. Per mantegnair l'attractivitad dal Grischun sco plazza economica èsi inditgà da sviluppar vinavant la politica chantunala dal lieu cun mesiras betg fiscalas che correspundan a las prescripziuns da la OECD.
Per quest intent propona la Regenza d'introducir l'instrument «credits da taglia» che stat da princip a disposiziun a tut las interpresas cun sedia en il chantun Grischun. Credits da taglia correspundan gia oz a la pratica internaziunala usitada e vegnan applitgads en differents pajais. Cun quest instrument duain vegnir rinforzadas las activitads d'interpresa ch'èn giavischadas e ch'èn degnas da vegnir promovidas da l'economia publica ed i duain vegnir dads impuls d'investiziun. Sco degnas da vegnir promovidas valan mesiras d'interpresa per augmentar la valurisaziun chantunala, per rinforzar la perscrutaziun, il svilup e l'innovaziun sco er en il sectur da la persistenza ecologica.
Agiunta:
Missiva tar la realisaziun da la taglia minimala da la OECD en il chantun Grischun
Infurmaziuns:
- Cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01 (cuntanschibel da las 14.30 fin las 15.30), e‑mail Marcus.Caduff@dvs.gr.ch
- Cusseglier guvernativ Martin Bühler, schef dal Departament da finanzas e vischnancas, tel. +41 81 257 32 01 (cuntanschibel da las 12.30 fin las 13.30), e‑mail Martin.Buehler@dfg.gr.ch
Responsabladad: Regenza