Suenter in temp da construcziun da circa in onn e mez ha la cussegliera guvernativa Carmelia Maissen surdà la mesemna en damaun uffizialmain la clav dal nov Center da la polizia stradala nord al cusseglier guvernativ Peter Peyer. Gia mez avust è la Polizia chantunala sa stabilida en l'edifizi ch'è situà fitg bain sper l'access a l'autostrada Cuira Sid. Sonda, ils 5 d'october 2024, avra il Center da la polizia stradala nord sias portas per la populaziun.

«Cun quest edifizi nov ha il chantun pudì stgaffir in lieu da lavur attractiv che permetta a las polizistas ed als polizists d'exequir optimalmain lur lavur per la segirezza da la populaziun e dals giasts», ha ditg il cusseglier guvernativ Peter Peyer, schef dal Departament da giustia, segirezza e sanadad. En il nov center lavuran tut en tut 50 collavuraturas e collavuraturs. Els èn responsabels per il provediment da basa da la polizia, dentant principalmain per incumbensas da la polizia stradala sin la A13 tranter Maiavilla e San Vittore. Ils territoris d'acziun dals Centers da la polizia stradala a Cuira ed a San Bernardino sa cruschan però. Ultra da quai vegnan optimads ils andaments interns dal manaschi a favur d'ina collavuraziun effizienta cun curtas vias da communicaziun. «Che l'access a l'autostrada A13 è datiers, è in dals avantatgs extraordinaris. En situaziuns, en las qualas mintga minuta quinta, èsi da fitg gronda valur, sch'ins cuntanscha svelt l'autostrada», ha ditg il cumandant da la polizia Walter Schlegel.

Persistent, funcziunal ed architectonicamain marcant
«Il nov Center da la polizia stradala na sa distingua betg mo tras sia funcziunalitad per las utilisadras ed ils utilisaders, mabain er tras sia moda da construir persistentamain e tras sia concepziun architectonica marcanta. Quai è in confess dal chantun a la persistenza», ha ditg la cussegliera guvernativa Carmelia Maissen, scheffa dal Departament d'infrastructura, energia e mobilitad. L'edifizi en furma da tur dat en egl en spezial tras ses elements stgirs enturn ed enturn, ch'èn levamain elevads. Quests elements sa cumponan da singuls moduls fotovoltaics che dattan a medem temp sumbriva a las grondas fanestras.

L'edifizi netto nulla è vegnì construì en moda energeticamain effizienta e schanegiond las resursas. Quai cumpiglia ultra da la producziun d'electricitad solara, il respargn da tecnica, da material e d'energia er la circulabladad sco er in microclima optimà. «Ils mirs da las paraids internas betg purtantas han ins construì cun craps d'arschiglia che n'èn betg vegnids ars. Quels procuran per in clima ideal da l'interiur», ha ditg l'architect chantunal Andreas Kohne.

Project exemplaric per la construcziun persistenta
En il rom dal «Plan d'acziun Green Deal» è il Center da la polizia stradala nord vegnì lantschà sco project da pilot. El vala gia oz sco in dals edifizis ils pli persistents en il Grischun. Responsabels per il project da construcziun cun il num «FAR» èn il team da planisaders generals Comamala Ismail Architectes da Delémont sco er la firma Andreas Lütscher Baumanagement SA da Haldenstein/Cuira. Per exequir las lavurs da construcziun han pudì vegnir incumbensadas per gronda part interpresas regiunalas. Ils custs per il project sa movan en il rom dal credit da 9,8 milliuns francs. Il Cussegl grond ha approvà quest credit en la sessiun d'avrigl 2022.

Fotografias agiuntadas:

Foto 2, Foto 3, Foto 4, Foto 5 (© Ingo Rasp)

Infurmaziuns:

• Andreas Kohne, architect chantunal, Uffizi da construcziun auta, tel. +41 81 257 36 31 (cuntanschibel da las 12.00 fin las 13.30), e‑mail Andreas.Kohne@hba.gr.ch
• Servetsch da medias da la Polizia chantunala, tel. +41 81 257 79 50, e‑mail info@kapo.gr.ch

La Polizia chantunala envida al di da las portas avertas

Sonda, ils 5 d'october 2024, ha la populaziun l'occasiun da visitar il nov Center da la polizia stradala da la Polizia chantunala dal Grischun. La Polizia chantunala dal Grischun envida al di da las portas avertas, che ha lieu da las 9.00 fin las 17.00, e pussibilitescha da dar in sguard davos las culissas. Las visitadras ed ils visitaders spetga in program varià.

Ultra da quai porscha l'Uffizi da construcziun auta visitas guidadas tras l'edifizi netto nulla.

Responsabladad: Uffizi da construcziun auta