Tar in vespertil da l'aua ch'è vegnì chattà en il chantun Glaruna ha il Center svizzer da frenesia cumprovà il virus da frenesia.

Il vespertil da l'aua han ins chattà ils 20 da settember 2024 a Mühlehorn (vischnanca da Glaruna Nord). Tant ils animals da chasa sco er ils animals selvadis valan en Svizra sco libers da frenesia. Tar ils utschels-mezmieur poi dentant tuttina darar dar singuls cas. Dapi l'onn 1992 èn vegnids diagnostitgads mo set cas en Svizra.

Tge far?
Sch'ins chatta in utschè-mezmieur, èsi impurtant da betg tutgar l'animal e d'infurmar la Fundaziun Protecziun dals utschels-mezmieur ubain la surveglianza da chatscha. Quai vala en spezial per animals selvadis malsauns cun in cumportament problematic. Sch'ins vegn mors d'in utschè-mezmieur, ston ins consultar immediatamain ina media u in medi per laschar instradar las mesiras preventivas necessarias. Per la populaziun na datti nagins motivs da far quitads. Dapli infurmaziuns dat il Center svizzer da frenesia.

En il chantun Glaruna exequescha l'Uffizi per la segirezza da victualias e per la sanadad d'animals dal Grischun il dretg veterinar, il dretg da victualias ed il dretg davart las substanzas chemicas.

Infurmaziuns:

Giochen Bearth, manader da l'Uffizi per la segirezza da victualias e per la sanadad d'animals, tel. +41 81 257 24 11 (cuntanschibel da las 11.00 fin las 12.00), e‑mail Giochen.Bearth@alt.gr.ch