En il rom d'ina denunzia penala ha l'Uffizi per la segirezza da victualias e per la sanadad d'animals contestà products da charn da la mazlaria dal Stabiliment giudizial Realta. Tranter auter era il cuntegn da charn-portg betg vegnì declerà u vegnì declerà en moda memia pauc precisa sin ils products. L'Uffizi per l'execuziun giudiziala ha reagì cun mesiras immediatas.

Sin fundament d'ina denunzia penala da cussedents cunter nunenconuschent e cunter las direcziuns dals stabiliments ha l'Inspecturat da victualias chantunal mess en salv products da charn en la butia dal bain puril ed en ils Stabiliments giudizials Realta e Cazas Tignez. Entant èn avant maun ils resultats da las analisas da l'Inspecturat da victualias chantunal. Els mussan pliras decleraziuns da products da charn betg confurmas. Uschia ha ina prova d'ina liongia da chasa da charn-bov per la vendita en la butia dal bain puril cuntegnì cumparts da charn-portg che n'eran betg decleradas. Tar auters products n'eran las cumparts da charn-portg betg decleradas suffizientamain. En ina furniziun per l'alimentaziun dals cussedents e dal persunal dals dus stabiliments era agiuntada ina fitg auta cumpart da charn-portg a products da charn-bov.

Suspendì ad interim la producziun en la mazlaria
Sin fundament da la denunzia penala ha l'Uffizi per l'execuziun giudiziala ordinà immediatamain da controllar la decleraziun da la charn e la persequitabilitad da la charn. «Nus stuain pudair garantir, che tut ils products da charn sajan declerads en moda correcta», di Mathias Fässler, il manader da l'Uffizi per l'execuziun giudiziala. «Nus avain intensivà nossas controllas internas e prendì sut la marella las responsabladads, ils process ed ils mecanissems da controlla en la mazlaria. Ultra da quai avain nus decidì da retrair ad interim mo pli charn da furniturs externs.» La direcziun da l'uffizi e las direcziuns dals stabiliments deploreschan quests eveniments e sa perstgisan tar ils cussedents, tar il persunal e tar la clientella ch'è vegnida trumpada en questa maniera. «Nus sperain che l'inquisiziun penala currenta portia svelt in scleriment cumplet e ch'ella possia vegnir terminada bainspert», di il manader da l'uffizi Mathias Fässler. Emprimas consequenzas areguard il dretg da persunal han ins gia tratg.

Infurmaziuns:

Mathias Fässler, manader da l'Uffizi per l'execuziun giudiziala, tel. +41 81 257 52 51 (cuntanschibel da las 15.00 fin las 16.00), e‑mail Mathias.Fässler@ajv.gr.ch

Responsabladad: Uffizi per l'execuziun giudiziala