Durant l'emprima emna da scola suenter las vacanzas d'atun è la tscherna dal studi stada en il center a la Scola chantunala grischuna. En duas occurrenzas principalas han las scolaras ed ils scolars da la Scola chantunala grischuna pudì sa fatschentar intensivamain cun lur perspectivas per il futur suenter la maturitad. Il program da la Scola politecnica federala Turitg «ETH unterwegs» e l'occurrenza per la tscherna dal studi «Schanzas», ch'è vegnida organisada da la Scola chantunala, han dà a las scolaras ed als scolars interessantas invistas da las diversas pussaivladads da direcziuns da studi e da scolaziuns cuntinuantas.

La gievgia, ils 24 d'october 2024, è la Scola politecnica federala Turitg (SPFT) stada envidada a la Scola chantunala grischuna. En il rom da ses program «ETH unterwegs» visitan studentas e students sco er docentas e docents da la scola auta renumada differentas scolas medias en Svizra. Quai cun l'intent da promover ils roms MINT (matematica, informatica, scienzas natiralas e tecnica) e da preschentar lur direcziuns da studi. «Sco purtadra dal label MINT da l'Academia svizra da las scienzas natiralas (SCNAT) èsi impurtant per nus, da mussar a nossas scolaras ed a noss scolars champs d'activitad orientads al futur, e quai en cooperaziun cun partenaris da la scienza, da la perscrutaziun, da l'economia e da l'industria. Plinavant vulain nus pussibilitar a las scolaras ed als scolars d'entrar en contact direct cun las differentas instituziuns,» accentuescha il prorectur dr. Urs Spirig, il commember da la direcziun da la scola ch'è responsabel per ils roms MINT.

Las scolaras ed ils scolars da la tschintgavla e sisavla classa gimnasiala han visità quel di differents referats spezialisads da docentas e docents da las SPFT davart temas da MINT, sco «intelligenza artifiziala per il futur da la medischina», «cumbatter privels da la natira cun fibras da vaider e supercomputers» ubain «telescops gronds per tschertgar ina segunda Terra». Ina prelecziun experimentala da chemia captivanta per tuttas 6. classas ha cumplettà il di.

Exposiziun e concurrenza da construir punts
Supplementarmain als referats spezialisads han las studentas ed ils students da la SPF dà invistas da las differentas direcziuns da studi en in'exposiziun. Las studentas ed ils students han preschentà lur direcziun da studi tschernida en moda captivanta ed illustrativa cun experiments e cun exponats. Plinavant han ellas ed els er respundì cumpetentamain las dumondas da las scolaras e dals scolars.

In ulteriur punct culminant è stada la concurrenza da construir punts, ch'è vegnida organisada da las studentas e dals students da la direcziun inschigneria da construcziun. Otg teams da scolaras e da scolars da la Scola chantunala grischuna han construì agens models da punts. La capacitad da chargia da quests models è alura vegnida examinada sin in indriz da testar mobil. Cun construir la punt han las scolaras ed ils scolars stuì observar cundiziuns generalas pretensiusas, uschia che l'incumbensa è stada ina sfida.

Barat cun studentas e students
Il proxim di han var 30 instituziuns da furmaziun cuntinuanta, tranter quellas universitads, scolas autas spezialisadas, scolas spezialisadas superiuras, federaziuns professiunalas e scolas da lingua, preschentà lur purschidas da scolaziun sin stans da fiera. Las scolaras ed ils scolars da tut las partiziuns da la Scola chantunala grischuna han profità da l'occasiun da s'infurmar en discurs persunals davart las differentas vias da furmaziun, da sclerir dumondas e da rimnar infurmaziuns impurtantas. La fiera che ha durà l'entir di ha dà ina invista cumplessiva da las pussaivladads suenter la maturitad professiunala, spezialisada u gimnasiala.

Ina discussiun da podium ha cumplettà il di. Anteriuras scolaras ed anteriurs scolars da la Scola chantunala grischuna han raquintà là da lur mintgadi sco studenta e student. Ellas ed els han dà tips e trics prezius davart la vita da studi e respundì las dumondas che las classas finalas avevan rimnà ordavant davart ils cuntegns dals studis sco er davart aspects pratics ed organisatorics da la vita da students.

Quella emna ha purschì a las scolaras ed als scolars in agid d'orientaziun impurtant per lur avegnir ed ha dà ad ellas ed els invistas dal mund da la scienza e da la tecnica.

Fotografias agiuntadas

Foto 2 / Foto 3

Infurmaziuns

• Philippe Benguerel, rectur da la Scola chantunala grischuna, tel. +41 81 257 51 51 (cuntanschibel da las 10.00 fin las 12.00 e da las 13.30 fin las 16.00), e‑mail Philippe.Benguerel@bks.gr.ch
• Dr. Urs Spirig, prorectur da la Scola chantunala grischuna e manader da la promoziun MINT, tel. +41 81 251 51 51 (cuntanschibel da las 10.00 fin las 11.30 e da las 13.30 fin las 15.00), e‑mail Urs.Spirig@bks.gr.ch

Responsabladad: Uffizi per la furmaziun media-superiura / Scola chantunala grischuna