Gia per la 17avla giada ha il chantun Grischun publitgà ina concurrenza per promover la lavur culturala professiunala per projects pitschens. Da tut en tut 31 dumondas èn vegnids tschernids tschintg projects che pon s'allegrar d'ina contribuziun d'ovra e d'in stipendi liber d'ina valur totala da 50 000 francs.
Grazia a quest sustegn finanzial survegnan las artistas ed ils artists la pussaivladad preziusa da sa deditgar dal tuttafatg a lur lavur creativa, senza il squitsch finanzial e professiunal dal mintgadi. La finamira da la concurrenza è quella da promover il svilup tematic da projects culturals e da rinforzar vinavant la diversitad da la cultura grischuna. Sa participar pon artistas ed artists professiunals che abitan dapi almain 2 onns en il chantun Grischun u ch'èn colliads stretgamain cun il chantun u cun la cultura grischuna. Ils projects inoltrads derivan da differents secturs artistics, sco l'art figurativ e l'art applitgà, la musica, il teater, il saut, la litteratura, l'istorgia e la memoria.
La Cumissiun da concurrenza ha giuditgà 31 dumondas ed ha lura elegì 5 projects sco er in'opziun. La decisiun finala davart la surdada da las contribuziuns è stada chaussa dal schef dal Departament d'educaziun, cultura e protecziun da l'ambient, il president da la Regenza Jon Domenic Parolini
Las suandantas tschintg persunas che lavuran sin il champ cultural han survegnì ina contribuziun d'ovra da mintgamai 10 000 francs:
- Num: Annetta Baumann, Cuira
Sparta: Teater
Project: «Igl figl perz»
- Num: Jürg Gautschi, Turitg
Sparta: Litteratura e teater
Project: «WAS TUN.!?»
- Num: Alessandro Ligato, Losone
Sparta: Art figurativ
Project: «Custode dell'Invisibile»
- Num: Robert Ralston, Berlin
Sparta: Istorgia e memoria
Project: «Monster»
- Num: Jérémie Sarbach, Ftan
Sparta: Art applitgà
Project: «Dendro Noise how environment inscribes itself into bodies»
Dapli infurmaziuns:
Infurmaziuns:
Andrea Conrad, manadra Promoziun da la cultura, tel. +41 81 257 48 07 (cuntanschibla da las 09.00 fin las 10.00), e‑mail Andrea.Conrad@afk.gr.ch
Responsabladad: Uffizi da cultura / Promoziun da la cultura