La Regenza dal chantun Grischun è sa laschada orientar oz davart la situaziun actuala a Brinzauls. Ella ha prendì enconuschientscha dal fatg, che la situaziun actuala pretenda in'evacuaziun preventiva dal vitg fin la fin da l'emna. La Regenza garantescha a la populaziun, a la suprastanza communala ed a las forzas d'acziun ses sustegn cumplain en questa situaziun difficila. Ultra da quai conceda ella ina contribuziun da 500 000 francs sco agid immediat.

A chaschun da la sesida da la Regenza dals 12 da november 2024 han il manader dal Stab directiv chantunal (SDC) Pascal Porchet ed il manader da l'Uffizi da guaud e privels da la natira (UGP) Urban Maissen infurmà davart la situaziun actuala en la vischnanca d'Alvra ed en il territori da la bova da Brinzauls. Pervia da la situaziun actuala sto Brinzauls puspè vegnir evacuà preventivamain. I vegn partì dal fatg, ch'ins na po durant plirs mais betg pli entrar en il vitg. Pervia da quai e sin dumonda da la vischnanca rinforza il chantun anc ina giada il sustegn dal Stab directiv communal (SDCom) e da las autoritads communalas tras il SDC. Particularmain pon ils organs communals consultar il SDC per decisiuns difficilas. En quest senn han ins er prendì la decisiun per la nova evacuaziun en stretga coordinaziun cun il SDC ed en il barat cun la Regenza.

Garantì ulteriur agid immediat
En vista a la nova evacuaziun ha la Regenza concludì da pajar in agid immediat supplementar da 500 000 francs. Questa contribuziun duai tranter auter gidar a pajar ils custs da midada e da locaziun betg cuvrids. Davart la repartiziun decida la vischnanca en coordinaziun cun la Cumissiun da donaziuns.

Lavur intensiva vi da mesiras a media ed a pli lunga vista
Actualmain vegni lavurà cun tutta forza vi da la gallaria da drenascha a Brinzauls. La finamira è quella da franar las activitads da la bova. Uschia vul ins proteger cunter donns – ultra dal vitg da Brinzauls – a pli lunga vista er la lingia da l'Alvra da la Viafier retica, las vias da l'Alvra e dal Güglia sco er ils implants electrics ed ulteriurs indrizs d'infrastructura. La planisaziun da la dischlocaziun vegn intensivada vinavant. Questa planisaziun preventiva duai pussibilitar da chattar in nov dachasa segir per la populaziun, sch'il vitg da Brinzauls u parts da tal stuessan vegnir bandunads definitivamain.

Solidaritad cun la populaziun ed engraziament a las forzas d'acziun
La Regenza exprima sia solidaritad envers la populaziun e giavischa a las persunas pertutgadas blera forza per il temp difficil vegnint. La Regenza engrazia er a tut las persunas responsablas al lieu, particularmain a las autoritads ed a l'administraziun communala d'Alvra ed a las forzas d'acziun, che gidan ad accumpagnar la glieud ed ils animals sche pussaivel senza donns tras questa crisa.

Dapli infurmaziuns:

Alvra – Info Bova da Brinzauls (albula-alvra.ch)

Infurmaziuns:

• Dumondas en connex cun il chantun:
  Il Servetsch da communicaziun da la Chanzlia chantunala coordinescha las dumondas da las medias e las transmetta als posts da servetsch cumpetents, quai per e-mail kommunikation@gr.ch u per telefon +41 81 257 22 18.
• Dumondas en connex cun la vischnanca:
  Daniel Albertin, president communal d'Alvra, e‑mail daniel.albertin@albula-alvra.ch

Responsabladad: Regenza