Mintgin da nus po esser pertutgà da violenza a chasa. Per sustegnair las persunas ch'èn pertutgadas da violenza sin lur via en ina vita senza violenza èsi impurtant, che las purschidas d'agid e da sustegn sajan enconuschentas ad ina vasta publicitad. Il tema central dals «Dis d'acziun cunter violenza a chasa» da quest onn en il Grischun è perquai «vias or da la violenza». Dals 25 da november fin ils 10 da december 2024 han lieu numerusas occurrenzas ed acziuns en l'entir chantun.
Co chattan persunas ch'èn pertutgadas da violenza sustegn? Tge purschidas d'agid datti per persunas ch'èn violentas e che vulan chalar cun quai? Co pon persunas spezialisadas, l'ambient social e la societad accumpagnar las persunas pertutgadas sin lur via or da la violenza? Questas ed ulteriuras dumondas stattan en il focus dals dis d'acziun. La finamira è quella da stgaffir ina plattafurma che promova il dialog e la conscienza per quest tema.
Mintga tschintgavla persuna è pertutgada da violenza en il partenadi
En connex cun violenza a chasa vegnan commess mintga onn var 20 000 malfatgs en Svizra. Mazzadas vegnan en media 25 persunas. Circa 75 pertschient dals delicts pertutgan violenza en in partenadi precedent u actual. D'ina enquista represchentativa da la populaziun da l'onn 2022 resulta, che mintga tschintgavla persuna en Svizra è gia stada pertutgada ina giada da violenza en il partenadi. Violenza a chasa chattan ins en tut las classas socialas. Las persunas spezialisads presuman, ch'i dettia in grond dumber zuppà.
Visiblamain cunter violenza a chasa
En il rom dals dis d'acziun mettan numerusas organisaziuns ed instituziuns en l'entir chantun in signal cunter violenza a chasa. Planisadas èn occurrenzas multifaras, sco preschentaziuns da films, concerts, installaziuns d'art e da glisch, exposiziuns, occurrenzas da benefizi, stans d'infurmaziun e teaters d'improvisaziun. Rundas da discussiun suenter intginas occurrenzas dattan l'occasiun da sa barattar e da discutar detagliadamain davart il tema. Er quest onn sa participescha in grond dumber da pasternarias dal Grischun als dis d'acziun. Durant quels dis vendan ellas pauns en stgarnuzs spezials cun infurmaziuns davart las purschidas d'agid per persunas pertutgadas.
Chattar cuminaivlamain «vias or da la violenza»
La populaziun è envidada da sa participar a las occurrenzas ed a las acziuns, da s'infurmar e da sensibilisar activamain per questa tematica sociala.
Il program dals dis d'acziun, las purschidas d'agid ed ulteriuras infurmaziuns stattan a disposiziun sin www.gr.ch/violenza-a-chasa.
La campagna interchantunala da sensibilisaziun «Toxic Love», ch'è vegnida lantschada cun success l'onn 2023, vegn er quest onn a far part dals dis d'acziun. La finamira da la campagna è quella da gidar ad identifitgar a temp violenza a chasa, quai cun remartgar ad ura signals d'avertiment, uschia ch'i po vegnir fatg diever a temp da las purschidas d'agid. Ulteriuras infurmaziuns chattais Vus sut www.toxiclove.ch.
Agiunta:
Program dals Dis d'acziun 2024
Fotografia agiuntada:
© Mathias Kunfermann 2023
Infurmaziuns:
Madlaina Baselgia, manadra dal Post da coordinaziun Violenza a chasa, Uffizi dal servetsch social dal Grischun, tel. +41 81 257 26 11 (cuntanschibla da las 10.00 fin las 12.00 e da las 15.00 fin las 16.00), e‑mail Madlaina.Baselgia@soa.gr.ch
Responsabladad: Uffizi dal servetsch social
Dis d'acziun sin l'entir mund
Dals 25 da november, il Di internaziunal cunter la violenza envers dunnas, fin ils 10 da december, il Di dals dretgs umans, mettan differentas organisaziuns sin l'entir mund in signal a favur d'ina societad senza violenza. L'illuminaziun oranscha d'edifizis, ch'è visibla durant quests dis sin l'entir mund, è in signal simbolic cunter violenza.
Ils «Dis d'acziun cunter violenza a chasa en il Grischun» èn inspirads tras las iniziativas dals dus moviments internaziunals «Orange Days» e «16 dis cunter violenza envers dunnas». Il chantun coordinescha e sustegna occurrenzas ed acziuns en las regiuns.