Per reducir il privel d'aua gronda en la planira da Cazas, è vegnì elavurà in concept general cun differentas mesiras da protecziun. Avant paucs dis han cumenzà las lavurs da construcziun per realisar quest concept. La fin da l'onn 2026 duai il project esser terminà.
En il rom da l'examinaziun da la charta da privels èsi vegnì constatà l'onn 2020, ch'ina gronda part da la planira da Cazas è periclitada tras aua gronda. Ils 31 da matg 2021 ha la cumissiun da privel cumpetenta approvà la charta da privels correspundenta en moda lianta per las autoritads. Sin quai è vegnì elavurà in concept general cun differentas mesiras per eliminar la periclitaziun tras aua gronda, e quai en l'entir fund da la val, a sanestra da la riva dal Rain Posteriur sco er tar ils auals che curran giu da la Mantogna en la planira.
Realisaziun dal project en etappas
Las mesiras en il sectur sid dal territori periclità èn suttamessas primarmain a la suveranitad da las vischnancas da Cazas e Tusaun e vegnan realisadas sut la direcziun da la partiziun Correcziun dals curs d'aua da l'Uffizi da construcziun bassa dal Grischun.
La part nord dal project consista da mesiras da protecziun da l'areal, ch'il chantun realisescha sco proprietari dal terren per proteger ses bains immobigliars, ses edifizis e ses stabiliments cunter aua gronda. Per quest intent ha il Cussegl grond concedì il december 2023 in credit dad 8 milliuns francs. Ina giada che las mesiras èn realisadas, n'èn ils stabiliments giudizials Cazas Tignez e Realta inclusiv il bain puril, la clinica Beverin, l'abitadi Quadra, l'Arena grischuna, la zona d'industria da Cazas sco er ulteriurs objects betg pli periclitads tras aua gronda. Cun las mesiras planisadas èsi previs da mantunar respectivamain d'auzar rempars, da construir e da schlargiar passadis d'auals sco er d'installar indrizs per franar l'aua. En singuls secturs vegnan ils auals e flums existents manads en in nov letg u adattads.
L'avust 2024 ha la vischnanca da Cazas concedì a l'Uffizi da construcziun auta la permissiun da construcziun per realisar l'emprim da dus secturs parzials, quai per las mesiras en la part nord dal project. Avant paucs dis han cumenzà las lavurs da construcziun. Las mesiras da protecziun da l'areal, che vegnan realisadas da l'Uffizi da construcziun auta dal Grischun, duain esser terminadas la fin da l'onn 2026.
Infurmaziuns:
Andreas Kohne, architect chantunal, Uffizi da construcziun auta dal Grischun, tel. +41 81 257 36 31 (cuntanschibel da las 14.30 fin las 15.30), e‑mail Andreas.Kohne@hba.gr.ch
Responsabladad: Uffizi da construcziun auta